گرووپێن چەکداران یێن ئۆپۆزیسیۆنا سووریێ یێن لگەل ئارتێشا ترکیێ ھەرێما عەفرینێ داگیر کرنە، 5 کەس رەڤاندن، د ناڤ وان دە بزیشکەک ھەیە.
رێخستنا مافێن مرۆڤان ل عەفرینێ د راپۆرەکێ دە بەلاڤ کر، چەکدارێن میلیشیایا پۆلیسێن لەشکەری ژ رۆژا 5ێ ئیلۆنا 2023 ڤە در. لەزگین سالح ژ مالا وی یا باژارێ عەفرینێ رەڤاندن و ھەتا نھا چارەنڤیسا وی نە دیارە.
دا زانین ژی، در. لەزگین سالح بزیشکێ دلی یە و پێشتر د سالا 2018 دە ژی ژ ئالیێ چەکدارێم ئەحرار ئەل-شەرقیێ ڤە ھاتبوو رەڤاندن و پشتی دایینا فدیەیێ، ھاتبوو بەردان.
رێخستنا مافێن مرۆڤان راگھاند ژی، چەکدارێن میلیشیایا ئەل-ھەمزات ژ رۆژا 9 ئیلۆنێ ڤە خۆرتێ ب ناڤێ محەمەد حەنان حوسێن ل رێبەندا گوندێ کیمارێ یێ ل ناڤچەیا شێرەوا رەڤاندن و ل ھەمبەر بەردانا وی، داخوازا فدیەیێ دکن.
ھەروھا گۆت ژی، چەکدارێ میلیشیایا پۆلیسێن لەشکەری ژ رۆژا 6 ئیلۆنێ ڤە وەلاتیێ ب ناڤێ ھاشم خەزال ژ باژارۆکێ جندرێسێ رەڤاندن و ھەتا نھا چارەنڤیسا وی نە دیارە.
رێخستنا مافێن مرۆڤان راگھاند ژی، چەکدارێن میلیشیایا پۆلیسێن لەشکەری ژ رۆژا 5 ئیلۆنێ ڤە وەلاتیێ ب ناڤێ عسمەت محەمەد ل رێبەندا گوندێ مەیدانا رەڤاندن و ھەتا نھا چارەنڤیسا وی نە دیارە.
دا زانین ژی، چەکدارێن میلیشیایا پۆلیسێن لەشکەری ژ رۆژا 24 تەباخا بۆری ڤە خۆرتێ ب ناڤێ شیار رەمزی شێخۆ ل گوندێ حەسەن دێرا رەڤاندن و پشتی فدیە دای، ھاتە بەردان.
ھەرێما عەفرینێ ژ ئادارا 2018 ڤە ژ ئالیێ ئارتێشا ترکیێ و گرووپێن چەکدارێن سەر ب وێ ڤە ھاتیە داگیرکرن و ھەتا نھا دۆرا 9 ھەزار کەسان ھاتنە رەڤاندن کو چارەنڤیسا ھەژمارەکە مەزن ژ وان نایێ زانین.
