ئەنجوومەنا ئاسایشا هەرێما کوردستانێ راگهاند، د ئۆپەراسیۆنەکە تایبەتا ئەنجوومەنا ئاسایشا هەرێما کوردستانێ دە، میرەکێ رێخستنا تەرۆریستا داعشێ هاتیە گرتن کو دەستێ وی د هەژمارەک کریارێن تەرۆرستی دە هەبوو.
ئەنجوومەنا ئاسایشا هەرێما کوردستانێ ئیرۆ 16ێ ئیلۆنێ د داخویانیەکێ دە راگهاند، ل سەر بنگەها زانیاریێن ئیستخباراتی و کۆمکرنا زانیاریێن راست، دەزگەهێن ئەنجوومەنا ئاسایشا هەرێما کوردستانێ د ئۆپەراسیۆنەکە تایبەت دە رۆژا 6ێ ئیلۆنا 2023ان میرەکێ رێخستنا تەرۆریستا داعشێ یێ ب ناڤێ (زێدان خەلیفە مەتەرێ باسکری ب ناڤێ ئەبوو لەیلە) دەستەسەر کر کو میرێ کارتێ (سەعد ئیبن ئەبی وەقاس ل ویلایەتا دیجلەیێ) بوو و ل چیایێ قەرەچووخ ل سەر ئەرکێ خوە بوو.
د داخویانیێ دە هات گۆت: «تەرۆریستێ گرتی د سالا 2014ان دە ل دەڤەرا شرگات تەڤلی رێخستنا تەرۆریستا داعشێ بوو، پشترە بوو بەرپرسێ مەفرەزەیا هاوانان و ل ئەنیێن مەخموور و قەرەجێ بەشداری شەرێ ل دژی هێزێن پێشمەرگەیێن کوردستانێ بوو.
پشتی رزگارکرنا ناڤچەیێن ژ دەستێ داعشێ د سالا 2017ان دە، ڤێ رێخستنێ چەند یەکینە ئاڤا کرن کو ناڤبۆری بەرپرسێ یەک ژ وان ل دەڤەرێن چیایێ قەرەچۆخێ، ئەبووشیتا و کوشاف بوو، ژ بۆ تەرۆرکرن و رەڤاندنا وەلاتیێن سڤیل و بەردانا وان ب پەرەیان.
