ھات بھیستن کو ژ سەرکردەیێن پەکەکێ مستەفا قاراسوو ل تەھرانێ یە. چاڤکانیێن نێزیکی پەکەکێ راگھاندن کو مستەفا قاراسوو یەک ژ دامەزرینەرێن پەکەکێ پشتی شەرێ د ناڤبەرا ھەسەدێ و عەشیرێن عەرەبێن دێرەزۆرێ دە ل تەھرانێ بوو و ل ور ژی ب فرۆکەیێ چووبوو شامێ.
ئیران حیمایەکرنا پەکەکێ ددۆمینە. ژ بۆ ل سەر پێیا ھشتنا پەکەکێ، ب تایبەتی د ڤان 5 سالێن داوی دە، دەولەتا ئیرانێ ژ ئالیەکێ ڤە پشتگریا چەک و لۆژیستیکی ل پەکەکێ دکە و ژ ئالیێ دن ڤە ژی ھەر جورە پشتەڤانیێ ددە سەرکردەیێن وێ کو ب سەلامەتی بژین و بگەرن. ل ھەمبەری ڤێ ژی پەکەکە ل رۆژئاڤا، شەنگال، کەرکووک و تەڤاھیا کوردستانێ ل گۆری ئاژەندەیا ئیرانێ تەڤدگەرە. د ڤێ چارچۆڤەیێ دە ھەری داوی ھات راگھاندن کو رێڤەبەرێ پەکەکێ مستەفا قاراسوو بەر ب تەھرانێ ڤە دچە. ھاتە زانین کو قاراسوو د 25 تەباخێ دە ژ دەریێ سینۆری یێ پێنجوینێ ل گەل کاروانەکی ترومبێلێن ئیستخباراتا ئیرانێ چووبوو ئورمیێ و 2 رۆژ شووندە دەرباسی تەھرانێ بوویە. چاڤکانی دیار دکن کو مستەفا قاراسوو پار چووبوو تەھرانێ و د سەردانێن خوەیێن بەرێ دە راستەراست ژ بالافرخانەیا سلێمانیێ رێڤینگی بۆ تەھرانێ دکر. لێ چاڤکانی دیار دکن کو ڤێ جارێ رێیا بەژایی ھاتیە هەلبژارتن ژ بەر کو پشتی ل بالافرگەھا سلێمانیێ ترومبێلا مەزلووم عەبدی ھاتیە تۆپبارانکرن وی ژی رێیا خوە ڤەگوھەست.
دەستپێکێ نۆژداری، پاشێ ژی ھەڤدیتن
ل گۆری زانیاریێن کو ژ ئالیێ چاڤکانیان ڤە ھاتن دایین، سەردانا مستافا قاراسوو دو ئارمانج ھەنە. یەک ژ ڤان پرسگرێکێن تەندورستیێ یێن قاراسوونە. ھات دیارکرن کو قاراسوو تووشی ڤایرۆسا مێلاکێ ببوو و ل نەخوەشخانەیەکە تایبەت یا پاسدارێن ئیرانێ دھات تەداویکرن. ئارمانجا دن ژی ئەوە کو ژ تەھرانێ بچە شامێ و لگەل ھێزێن ئیستخباراتا سووریێ ھەڤدیتنان پێک بینە.
ل گۆر زانیاریان قاراسوو د ھەفتەیا ئەول یا مەھا ئیلۆنێ دە ژ تەھرانێ چوویە شامێ و 5 رۆژان ل ور مایە. پاشێ ڤەگەریایە تەھرانێ.
تەداویا کاراسوو یا ل تەھرانێ ھێ ژی ددۆمە. لێ د چەند رۆژێن پێشییا مە دە دێ ڤەگەرە جھێ خوەیێ سلێمانیێ.
ل گۆری ئاگاھیان، لگەل قاراسوو ئەندامەکی دن یێ کۆنسەیا کەجەکێ ھەیە. د ناڤا ئاگاھیێن ھاتین بدەستخستن دە ژ بەر کو قاراسوو بێھشوبیرە و بیردانکا وی تێک چوویە، ئەندامەکی دن لگەل دگەریت. لێ ژ بۆ ئاستا نوونەراتیێ قاراسوو د ھەڤدیتنان دە جھ دگرە.
ل گۆری زانیاریێن ب دەست مە کەتی، ئیران دخوازە رێکەفتنەکا نوو د ناڤبەرا رەژیمێ و ھێزێن ھەسەدێ یێن رۆژئاڤا دە چێبکە. ھاتە دیارکرن کو ئیران ژ بەر کریارێن ئەمەریکا یێن ل ھەرێمێ پر نیگەرانە، دخوازە پەیمانا د سالا 2012 دە ل رۆژئاڤا د ناڤبەرا رەژیمێ و پەکەکێ دە ھاتبوو ئیمزەکرن نوو بکە و د چارچۆڤەیا پەیمانەکە نوو دە ھەر دو ھێز تەڤبگەرن.
دخوازن پەیمانا 2012 نووژەن بکن
ب پەیمانا کو د سالا 2012 دە ب پشتگری و گارانتیا ئیرانێ ھاتیە ئیمزە کرن، ھێزێن رەژیما ئەسەد ژ ھەموو باژارێن کوردستانێ ڤەکشیان و پێکھاتەیێن پەکەکێ وەکە پەیەدێ و تەڤدەمێ ل ھەرێما رۆژئاڤا بجھ بوو. د بەرامبەری کو پەکەکە رێ نەدە رێخستنێن دن یێن کورد دەرباسی ھەرێما رەژیما ئەسەد ببن و دژبەرێن رەژیمێ ژ رۆژئاڤا بێن دوور خستن، گرێبەستەک ھات ئیمزا کرن. رێژیما ئەسەد فرۆکەخانەیێن حەسەکێ و قامشلۆ رادەست نەکرن. مووچەیێن کارمەندێن رۆژئاڤا ھێ ژی ژ ئالیێ رەژیمێ ڤە تێن دایین. واتە، ئەڤە 10 سالن پەڤچوونەکا ب شێور ل سەر بەرژەوەندییێن ھەڤبەش ددۆمە.
لێ د ڤان دەمێن داوین دە پشتی کو ئەمەریکا کۆریدۆرا ئەولەھیێ ڤەکری، ب تایبەتی ل سەر سینۆرێ ئوردون-ئیراق-سووریێ، چەکدارێن عەرەب ل ور ب جھ کرن، د ناڤبەرا رەژیم و ھەسەدێ دە ئالۆزی دەرکەت و ھەسەدە ب ئاوایەکی ڤەشارتی تەڤلی ڤێ پرۆژەیێ بوو. ئالۆزییێن دێرەزۆرێ ل گەل عەشیرێن عەرەبان روودایی ژی د ڤێ چارچۆڤێ دا پێک ھاتنە.
ئیران نھا ڤێ رەوشا سووریێ تێرا خوە نابینە و دخوازە پێنگاڤەکە نوو باڤێژە. ل سەر ڤێ مژارێ دخوازە پەکەکە و ئیستیخباراتا سووریەیێ رێکەفتنەک نوو چێبکن و پێڤاژۆیەکا نوو بدە دەستپێکرن.
پەکەکە ب پالپشتییا ئیرانێ خوە رادگرە
چاڤکانیێن نێزیکی پەکەکێ رادگھینن کو پەکەکە نکارە بێی ئاریکارییێن ئیرانێ خوە راگرە ژ بەر کو رێڤەبەرییا پەکەکێ ژیانا خوەیا رۆژانە ب چاڤکانیێن ئیرانێ برێڤە دبن. ل گۆری ئاگاھیان، ئەو دبێژن قاراسوو گارانتی دایە رایەدارێن ئیستخباراتا ئیران و سووریێ و گۆتیە، “ئەم رێ نادن کو ھەسەدە ژ ئالیێ ئەمپەریالیزمێ ڤە بهێت رێڤەبرن.”
پەکەکە نکارە ب تەمامی ھەسەدێ کۆنترۆل بکە. لێ ل گۆری بەرنامەیا ئیرانێ، وەکە حەشدا شەعبی د بن کۆنترۆلا ئیرانێ دە وێ تەڤبگەرە. د ئێریشێن ل سەر ھەرێما کوردستانێ و ب تایبەتی یێن ل سەر شەنگالێ تێن کرن دە ئەڤ ھەر دو ھێز ھەڤپشکن.
