د چارچۆڤەیا جیبجی کرنا رێکەفتنا ئەولەهیێ یا د نێڤبەرا ئیران و ئیراقێ دە و پشتی گەفێن دەولەتا ئیرانێ یێن ئۆپەراسیۆنا ل سەر سینۆر، هێزێن پێشمەرگەیێن پارتیێن رۆژهلاتێ کوردستانێ کامپێن خوە تەرکاندن و چوون جھەکی دن. ھێزێن پاسەوانێن سینۆری یێن ئیراقێ و پێشمەرگەیێن حکوومەتا هەرێما کوردستانێ رۆژا 13/9/2023ان ب رێ کەتن دا کو ھەرن جھێن کو ڤان پارتیان ژ بەر گەفێن ئیرانێ یێن ئەنجامدایینا ئۆپەراسیۆنێ ب جی هشتبوون، هەیا کو پێشیا ئۆپەراسیۆنەکە موحتەمەل بگرن. لێ بەلێ ھێزێن پەکەکێ ئێریشی پێشمەرگەیێن کو چوون ھەرێمێ و خوەستن ئۆپەراسیۆنێ راوەستینن، کرن، و خوەستن ئەو ل کامپێن پێشمەرگەیێن رۆژهلات ب جی ببن.

پەکەکە دخوازە جھێن کو پارتیێن رۆژھلاتێ کوردستانێ ب جی ھشتنە داگیر بکە. لەوما ئێریشەکە پرۆڤۆکاتیف ل دژی پاسەوانێن سینۆری یێن ئیراقێ و پێشمەرگەیێن کوردستانێ پێک تینە.

مەدیا پەکەکێ ژ بۆ رەواکرنا داگیرکەریا خوە بەردەوام نووچەیێن دەرەو پارڤە دکە و دخوازە ڤێ جی گرتنا هێزێن پاسەوانێن سینۆری و پێشمەرگەیێن کوردستانێ ل ناڤچەیێن سینۆری وەکە ئێریشەکە ل دژی پەکەکە دەستنیشان بکە.

چ قەومی

پێش نها دەولەتا ئیرانێ راگھاندبوو کو ئەوێ ل سەر سینۆر ئۆپەراسیۆنەکە بەژاهی ل دژی ھێزێن رۆژھلاتێ کوردستانێ پێک بینە. پشتی ھەڤدیتنێن رایەدارێن ئیراق و ھەرێما کوردستانێ یێن ل گەل ھێزێن رۆژھلاتێ کوردستانێ یێن ل ھەرێمێ، ئەڤ ھێز ژ هن ناڤچەیێن سینۆری ڤەکشیان. ھێزێن ئیرانێ ھەتا 19 ئیلۆنێ موھلەت دابوو ھێزێن رۆژھلاتێ کوردستانێ کو ژ ھەرێمێ دەرکەڤن. ھێزێن رۆژھلاتێ کوردستانێ د 11 ئیلۆنێ دە ژ ھەرێمێ دەرکەتن.

پشتی ڤەکشینا ڤان هێزێن رۆژهلاتێ کوردستانێ، شاندەکە حکوومەتا ئیراقێ سەردانا تەھرانێ کربوون و دیار کربوون کو ھێزێن رۆژھلاتێ کوردستانێ یێن ل وێ ناڤچەیێ دەرکەتنە و ژ بەر ڤێ یەکێ تو سەدەمەک کو ئیران ئێریش بکە تنەیە.

ل ئالیێ دن پەکەکە ل بەندا دەرفەتێ بوو کو ژ فرسەندێ سوود وەربگرە و خوە ل شوونا پارتیێن رۆژھلاتێ کوردستانێ ب جھ بکە.

چما ئیرانێ ب تەنێ گەف ل پێشمەرگەیێن رۆژهلات کر، چما گەف ل چەکدارێن پەکەکێ نەکر؟

ئیرانێ ب ت ئاوا گەف ل پەکەکێ و هێزێن سەر ب وێ ڤە نەکر کو ناڤچەیێن سینۆری یێن د نێڤبەرا باشوورێ کوردستانێ و ئیرانێ بتەرکینن، ئیرانێ ب تەنێ گەف ل حکوومەتا هەرێما کوردستانێ و پێشمەرگەیێن رۆژهلاتێ کوردستانێ کرن، هەیا نها ژی یەک چەکدارێ پەکەکێ ژ یەک بارەگەهێ خوە دەرنەکەتیە و دەرناکەڤە ژی، ژ بەر کو ئیران وان وەکە پاسەوانێن سینۆری یێن خوە دبینە، و وکە دخویە رێکەفتنەکە نەهێنی د نێڤبەرا وان دە هەیە.

هێزێن پێشمەرگە یێن سەر ب پارتیێن رۆژهلاتێ کوردستانێ د ڤێ مژارێ دە ب بەرپرساتی تەڤگەریان، ژ بۆی نەهشتنا گەفا ئیرانێ ل سەر حکوومەتا هەرێما کوردستانێ و ستاتویا فەرمی یا ڤێ پەرچەیا ئازادا کوردستانێ ژ بنکە و بارەگەهێن خوە یێن سینۆری ڤەکشیان، د دەمەکی ب ڤی ئاوا دە، پەکەکە و رێخستنێن سەر ب وێ ڤە مژوولی داگیرکرنا ڤان بنکە و بارەگەهانن و ل پەی بەرژەوەندیێن خوە یێن شەخسی دگەرن.

تەڤگەرێن پەکەکێ و رێخستنێن سەر ب وێ ڤە ل سیدەکانێ ژ بۆی داگیرکرنا بنکە و بارەگەهێن پارتیێن رۆژهلاتێ کوردستانێ ژ ئالیێ ئیرانێ ڤە راستی ت بەرتەکەکی نەهات، ئیرانێ زێدەتر ژ پاسەوانێن سینۆری یێن ئیراقێ باهوەری ب پەکەکێ و رێخستنێن سەر ب وێ ڤە هەیە لۆما ت جاران ژ هێزین پەژاک-پەکەکێ نەخوەستیە ناڤچەیێن سینۆری یێن ب ئیرانێ رە ب جی بهێلن، ترسا ئیرانێ ب تەنێ ژ پارتی و پێشمەرگەیێن رۆژهلاتێ کوردستانێ یە، نها پەکەکە مینا حەشدا شەعبی یا ئیراقێ ب تەمامی کەتیە د بن باندۆرا ئیرانێ دە و فەرمانا ژ ئیرانێ وەردگرە.