ئەنجوومەنا نشتمانی یا کورد ل سووریێ (ئەنەکەسە) بانگ ل وەلاتیان دکە، ب ئارمانجا شەرمەزارکرنا کریارێن رێڤەبەریا خوەسەر و زێدەکرنا نرخێ سۆتەمەنیێ، سبە سێشەمبێ دەست ب گرەڤەکە ئاشتیانە بکن.
سەکرەتەریا گشتی یا ئەنکەسێ ئیرۆ 18 ئیلۆنێ د داخویانیەکێ دە راگھاند، “ئێش و ئازارێن ھەموو پێکھاتەیان ل ھەرێمێن کو رێڤەبەریا پەیەدێ برێڤە دبە، بەردەوامن و ژ ئەنجاما سیاسەتا کو ئەڤ رێڤەبەری دمەشینە و ژ ئەنجاما زێدەکرنا نرخێ ھەموو کەلووپەلان و کرێیا چوونووھاتنێ، بارەکی گران ل سەر ملێ وەلاتیان ھاتیە دانین، کو دبە سەدەما وەلاتی ب نەچاری کۆچبەر ببن.”
د داخویانیێ دە ھات گۆتن: “ئەنەکەسە د دەما کو ھەموو بنپێکرنێن کو وەلاتی راستی وان تێن، د ناڤ دە بەردەوامیا گرتنا چالاکڤان و ئەندامێن ئەنەکەسێ، ئارمانجکرنا دەبارا ژیانا خەلکێ و برچیکرنا وان ب رێ و رێبازێن جوربجور شەمەزار دکە، د ھەمان دەمێ دە ژی بریارا بلندکرنا نرخێ سۆتەمەنیێ شەرمەزار دکە.”
ئەنەکەسە دبێژە: “د دەما کو ئەم خوەپێشاندانێن ل دژی ڤێ بریارا نەدادپەروەر ھاتنە لدارخستن، بلند دنرخینن، ئەم داخوازا بداویکرنا وان بریاران، رێزگرتنا ل مافێن مرۆڤان و ھلوەشاندنا بریارا زێدەکرنا نرخێ سۆتەمەنیێ دکن.”
ئەنەکەسێ د داویا داخویانیا خوە دە، ژ بۆ وان داخوازان بانگ ل ھەموو پارتیێن سیاسی، رێخستنێن جڤاکا سڤیل و خەلکێ کر کو سبە سێشەمبێ 19 ئیلۆنێ دەمژمێر 17:00 ل بەر بارەگەھا نەتەوێن یەکگرتی یا ل قامشلۆ دەست ب گرەڤەکە ئاشتیانە بکن.
پشتی زێدەکرنا نرخێ سۆتەمەنیێ ب رێژەیا ژ %250 – %425 ژ ئالیێ رێڤەبەریا خوەسەر رە، بوو سەدەما نەرازیبوونەکە گشتی یا بەرفرەھ ل پرانیا باژار و ناڤچەیێن رۆژئاڤایێ کوردستانێ، ئیرۆ ژی ل قامشلۆ، دێرک، منبج و کۆبانێ خوەپێشاندان و گرەڤێن ئاشتیانە ھاتنە کرن و دوکان و بازار ھاتن گرتن.
