چاڤدێره‌كی سیاسی رادگهینه كو په‌كه‌كه ژ چه‌ندین ئالییان ڤه بوویه گه‌فت و خه‌ته‌ری ل سه‌ر هه‌رێما كوردستانێ و ب سالانه شه‌ری دفرۆشه هێزێن پێشمه‌رگه و حكوومه‌تا هه‌رێما كوردستانێ، هه‌بوونا چه‌كدارێن په‌كه‌كێ رۆژ ب رۆژ ل باشوور زێده‌تر دبه و ئه‌ڤ یه‌ك ژی سه‌ده‌ما سه‌ره‌كه‌یه كو خه‌ته‌ری بدومه و زێده‌تر ببه.
د. ئاراس عه‌بدوللا بۆ رۆژنامه‌یا خه‌بات دبێژه: “هه‌بوونا په‌كه‌كێ ل ناڤ خاكا هه‌رێما كوردستانێ و ئیراقێ نه‌مه‌شرووعه و خه‌ته‌رییه‌ك مه‌زنه، ژ به‌ر كو ل گۆری یاسایێن ناڤده‌وله‌تی نابه خه‌لكێ كو ل وه‌لاتێن دن دمینن هێزێن چه‌كداری هه‌بن، لێبه‌لێ په‌كه‌كێ نه‌ته‌نی چه‌كدار هه‌نه، به‌لكو ئه‌ڤ چه‌كدار ل هه‌ژماره‌كه باژار و باژارۆكێن كوردستانێ به‌لاڤه‌كرنه و پڕ زه‌لاله كو وان پشتگریه‌ك هه‌رێمی هه‌یه و ئه‌ڤ یه‌ك ژی خه‌ته‌رییا ل سه‌ر هه‌رێما كوردستانێ زێده‌تر دكه و شه‌رفرۆشیێ ژی پێتر دكه”.
چاڤدێرێ سیاسی د وێ باوه‌رێ ده یه كو په‌كه‌كه ژ چه‌ندین روویان ڤه بوویه خه‌ته‌ری ل سه‌ر هه‌رێما كوردستانێ، ژ به‌ر كو ژ ئالییه‌كی له‌شكه‌رێ تركیێ كێشی ڤێ ده‌رێ دكه و هنجه‌تان دده ده‌ستێ تركیێ كو ئێریشێ كوردستانێ بكه و ب ڤێ سه‌ده‌مێ سینۆره‌كی پڕ مه‌زن یێ گوند و ناڤچه‌یێن هه‌رێما كوردستانێ كه‌تیه ژێر هه‌ژموونا تركیێ.
هه‌ر وها خه‌ته‌رییا دویه‌مین ژی ئه‌ڤه كو نێزی هه‌زار گوندان ب سه‌ده‌ما چه‌كدارێن په‌كه‌كێ هاتنه چۆلكرن و په‌كه‌كه ناڤچه‌یێن كو لێ یه مینرێژ دكه و ب سه‌ده‌ما ڤان ماینان ب ده‌هان كه‌سێن سڤیل شه‌هید كه‌تنه.
د به‌شه‌كا دن یا گۆتنێن خوه ده د. ئاراس عه‌بدوللا دبێژه: “په‌كه‌كه دیسا بوویه سه‌ده‌م كو په‌یمانێن نێڤبه‌را حكوومه‌تا هه‌رێما كوردستانێ و حكوومه‌تا فه‌ده‌رال یا ئیراقێ نه‌یێن جی ب جی كرن، میناك په‌یمانا شه‌نگالێ”.
د. ئاراس دیار كر، په‌كه‌كه بوویه سه‌ده‌م كو ده‌وام گوند و ناڤچه‌یێن هه‌رێما كوردستانێ بكه‌ڤن به‌ر ئێریشێن هه‌وایی یێن تركیێ و ئه‌ڤ یه‌ك ژی بوویه سه‌ده‌ما ترس و نه‌ئارامیێ ل جه‌م گه‌لێ هه‌رێما كوردستانێ، لۆما ژى حكوومه‌تا هه‌رێما كوردستانێ مافداره ژ بۆی پاراستنا جانێ شێنیێن خوه داخوازا جی ب جی كرنا په‌یمان و یاسایێن ناڤده‌وله‌تی ژ بۆی كێمكرنا خه‌ته‌رییا په‌كه‌كێ بكه.
ل داوییا ئاخافتنا خوه ژی د. ئاراس گۆت كو په‌كه‌كه ل پاشه‌رۆژێ وێ پرسگرێكێن كوورتر ژ بۆی هه‌رێما كوردستانێ ده‌رخه و شه‌رفرۆشییا وێ ژی ب هێزێن پێشمه‌رگه و حكوومه‌تا هه‌رێما كوردستانێ دێ زێده‌تر ببه.
