ئالۆزیێن ل باژارێ حەسەکێ د ناڤبەرا ھێزێن بەرەڤانیا نیشتیمانی و ھێزێن رێژیمێ دە ھێژ بەردەوامن و ھێزێن ئاسایشێ ھەموو دەریێن نێزیکی چارگۆشەیا ئەولەھیێ گرتن دا کو رێ ل رەڤینا ئەندامێن بەرەڤانیا نیشتیمانی بۆ ناڤ تاخێن حەسەکێ بگرە.
دوھی ئالۆزی و پەڤچوون د ناڤبەرا ھێزێن بەرەڤانیا نیشتیمانی ژ ئالیەکی و ھێزێن رێژیمێ ژ ئالیەکی دن ڤە ل چارگۆشەیا ئەولەھیێ یا حەسەکێ دەرکەتن. پەڤچوون ب ناڤبەر بەردەوامن و ھێژ ژی فەرماندارێ ھێزێن بەرەڤانیا نیشتیمانی عەبدولقادر حەمۆ خوە رادەستی ھێزێن رێژیمێ نەکریە.
ل گۆر زانیاریێن رەوانگەھا سووری یا مافێن مرۆڤان، د ئەنجاما پەڤچوونان دە، لەشکەرەکی رێژیما سووریێ ھات کوشتن و 4 لەشکەر ژی بریندار بوون. ھەروھا 5 کەسێن سڤیل بریندار بوون.
رەوانگەھێ دیار کر ژی، 16 چەکدارێن بەرەڤانیا نیشتیمانی خوە رادەستی ھێزێن حکومەتێ کرن.
ھەر وھا چەند تۆپێن ھاوانێ ل تاخێن نیشتەجھان یێن د بن کۆنترۆلا رێڤەبەریا خوەسەر دە، ل تاخێن سالحیە، موفتی و گوێران کەتن، بێ کو زیانێن جانی بێن تۆمارکرن، تەنێ زیانێن مادی دەرکەتن.
ئالۆزی و پەڤچوونێن ل حەسەکێ پشتی وێ یەکێ تێن، حکوومەتا سووریێ ھەول ددە فەرماندارێ ھێزێن بەرەڤانیا نیشتیمانی عەبدولقادر حەمۆ بگوھەرن، ژ بەر ھەبوونا ناکۆکیان د ناڤبەرا وی و سەرۆکێ عەشیرا جبووری دە.
ھێزێن بەرەڤانیا نیشتیمانی کۆمەکا لەشکەری یا سووریێ یە کو د داویا سالا 2012 دە ژ ئالیێ رێژیما سووریێ ڤە ھاتیە ئاڤاکرن و ئەرکێ وێ پشتگریا ئۆپەراسیۆنێن ئارتێشا سووریێ یێن ل دژی ئۆپۆزیسیۆنا چەکدارە.
