پارتیا دەمۆکراتا کوردستانێ ل سووریێ (پەدەکە-سە) د داخویانیەکێ دە راگھاند، “تێکچوونا رەوشا ئابۆری و ئەولەھیێ و سیاسەت و کریارێن رێڤەبەریا پەیەدێ دە، جوانێن کورد نەچار دکە کو کۆچبەر ببن.”
سەرکردایەتیا پەدەکە-سێ رۆژا 17ێ ئیلۆنێ جڤیا و تێ دە رەوشا گشتی، رەوشا سیاسی یا سووریێ و پێشھاتێن داوییێ یێن ل رۆژئاڤایێ کوردستانێ و سووریێ گۆتووبێژ کر و دەربارێ ناڤەرۆکا جڤینێ دە ژی دوھ داخویانیەک بەلاڤ کر.
پەدەکە-سێ د داخویانیا خوە راگھاند، “ژ ئەنجاما رەوشا خراپا ئابۆریێ، بلندکرنا نرخێ سۆتەمەنیێ، لگەل تێکچوونا رەوشا ئەولەھیێ و سیاسەت و کریارێن پەیەدێ یێن ل دژی ئەندام و ئالیگرێن ئەنەکەسێ و رەڤاندنا وان، ژ بلی دیاردەیا بکارئانینا مادەیێن ھشبر، زێدەبوونا تاوانان و رەڤاندنا جوانان ب زۆرێ بۆ لەشکەریا نەچاری، فشارەکە مەزن خستیە سەر نفشێ جوانان کو نەچار دبن ژ جھ و وارێ خوە کۆچبەر ببن.”
د بەشەکە دنا جڤینێ دە بەحسا رەوشا ئۆپۆزسیۆنا سووریێ ھاتە کرن و پەدەکە-سێ دیت کو کارێ ئۆپۆزیسیۆنێ د بن ئاستا پێویست دە یە، کو پێویستی ب پێداچوون و لێڤەگەرەکە رەخنەیی یا بەرفەرەھ ژ گۆتار، رەفتار و کریارێن وێ ھەیە، ژ بۆ راستکرنا شاشتیان و ژ بۆ رێ ل بەر تاوان و بنپێکرنێن ل ھەرێمێن عەفرین، سەرێ کانیێ و گرێ سپی بێ گرتن، ژ بۆ سڤککرنا ئێش و ئازارێن وەلاتیان و باشکرنا پێویستی و پێدڤیێن وان.
د ڤێ دەربارێ دە، پەدەکە-سێ پێشوازی ل بریارا وەزارەتا خەزینەیا ئامەریکایێ یا سزاکرنا ھندەک ئالیان و گرووپێن چەکداران کر و گۆت، دڤێت ژ بۆ وان ببە دەرسەک و ژ بۆ رەفتار و کریارێن خوە بگوھێرن و ھەروھا پێویستە حکوومەتا دەمکی و ئیتیلاف ب جدی ل سەر سزایێن ئامەریکایێ راوەستن و ھەموو کێشەیان چارەسەر بکن.
ھەر د ڤێ دەربارێ دە پەدەکە-سێ داخواز کر کو دڤێت سزایێن ھەری گران ل تاوانکارێن تاوانا کوشتنا 4 شەھیدێن شەڤا نەورۆزێ ل جندرێسێ بهێن برین.
