ل رۆژئاڤا بنپێکرنێن مافێن مرۆڤان بەردەوام دکن. جوانێن شۆرەشگەر، ھێزا سەرکۆتکەرا پەکەکێ یا ل رۆژئاڤا، ل ھەمبەری رەخنەگرێن دەستهلاتا رۆژئاڤا فاشیزمێ دمەشینە. ب دارێ زۆرێ خەلکێ ناچار دکن ژ دەستهلاتا رۆژئاڤا لێبۆرینێ بخوازن. خۆرتەکی کو بلند بوونا بهایێ سۆتەمەنیێ ب رێژەیا 400% رەخنە کری ھاتە رەڤاندن و ئیشکەنجە کرن، ب زنجیرا هات گرێدان و نەچار کر لێبۆرینێ بخوازە و ڤیدیۆیا لێبۆرین خواستنا خوە ژی پارڤە بکە.
خەباتا ھەری داوی یا مافیایی یا رێخستنا جوانێن پەکەکێ یا ل رۆژئاڤا جوانێن شۆرەشگەر، رەڤاندنا جوانەکی ل کۆبانێ بوو.
د داخویانیا کو ژ ئالیێ چالاکڤانێ مافێن مرۆڤان محەمەد بۆزانێ کو ل سەر رۆژئاڤا خەباتێن خوە دمەشینە دە ھاتە گۆتن کو جوانێ کو ھەفتەیا بۆری زێدەکرنا 400 ژ سەدێ یا بهایێ سۆتەمەنیێ ل رۆژئاڤا رەخنە کربوو، ھاتە رەڤاندن، راستی ئیشکەنجەیێ ھات و نەچار ما کو لێبۆرینێ بخوازە.
جوانێ ب ناڤێ رێبەر حوسەین ل سەر حەسابا خوە یا مەدیایا جڤاکی زێدەکرنا بهایێ سۆتەمەنیێ رەخنە دکە و ب چێکرنا ڤیدیۆیەکێ بانگ ل رایا گشتی دکە کو بکەڤن ناڤا تەڤگەرێ و ل دژی زێدەکرنا بهایێ سۆتەمەنیێ نەرازیبوونا خوە دیار بکن.
چەند رۆژان پشتی ڤێ ڤیدیۆیێ رێبەر حوسەین ژ ئالیێ رێخستنا پەکەکێ یا ب ناڤێ جوانێن شۆرەشگەر ڤە ھات رەڤاندن. جوانێ کو راستی ئیشکەنجەیێن گران ھاتی، دەما دەست و لنگێن وی گرێدایی نە، نەچار دمینە لێبۆرینێ بخوازە و دیمەنێ وی تێ کشاندن.
رێبازا داعشێ تێ بکارئانین
جوانێن شۆرەشگەر رێخستنەکە کو ل رۆژئاڤا د ناڤا سەرکردایەتیا فەرمی و نەفەرمی یا پەکەکێ دە جھ دگرە. چالاکیێن ب ڤی رەنگی ھەم ب ئاگاھیا پەکەکێ ھەم ژی ب ئاگاھیا رێڤەبەریا رۆژئاڤا تێن کرن. ئەڤ رێخستن سازیەکە کو ژ دەستپێکا پێڤاژۆیا ل رۆژئاڤا ڤە ل دژی دژبەرێن پەکەکێ یێن کورد تێ بکارئانین.
پەیەدە ل دژی ئۆپۆزسیۆنێ رێبازێن داعشێ بکار تینە. داعشێ ژی ب دارێ زۆرێ ڤیدیۆیێن کەسێن دژبەر دگرتن و ب چێکرنا ڤیدیۆیان ئەو دترساندن.
دەمۆکراسیا رۆژئاڤا
ھەر چقاس پەکەکە و مەدیایا وێ ھەر تم پەسنا دەمۆکراسیا ل رۆژئاڤا بدن ژی، لێ دەستهلاتدارێن رۆژئاڤا د ئەسلێ خوە دە ھەمان رێبازێن کو داگیرکەرێن کورد ل سەر کوردان دان مەشاندن، ل دژی گەلێ کورد ب کار تینە. د بن ناڤێ شانۆیا دەمۆکراسیێ دە جڤین تێن لدارخستن، چالاکیێن مافێن ژنان تێن رێکخستن، لێ کەسێ کو رەخنەیێ ل رێڤەبەریێ بگرە ژی نایێ قەبوولکرن. ب تایبەتی ژی کوردێن ئۆپۆزسیۆن راستی ھەر جورە چەوساندنێ تێن.
رێڤەبەریا رۆژئاڤا ھەموو رێبازێن کو دەولەتا ترک د سالێن 1990 دە ل سەر کوردان سەپاندین، وەکە ئیتیرافکرن، رەڤاندن، کوشتنێن کریار نەدیار و ھتد ل دژی گەل ب کار تینە.
