پارتیا وەلاتپارێزێن کوردستانێ (PWK) ب بۆنەیا سالڤەگەرا شەشەمین یا ریفراندۆما سەرخوەبوونا کوردستانێ، داخویانیەک نڤیسکی بەلاڤ کر و راگەھاند، لێخوەدیدەرکەتنا ئیرادەیا ریفراندۆما سەرخوەبوونێ و پاراستنا دەستکەفتیێن باشوورێ کوردستانێ ئەرکەکی نەتەوی یە.
ل گۆر نڤێسینگەها راگەھاندنێ یا PWK داخویانی وھا یە:
د رۆژا 25ێ ئیلۆنا 2017ان دە، ل باژارێن کو ب رێڤەبەرییا ھەرێما کوردستانێ ڤە گرێدایی نە (ھەولێر، سلێمانییە، دھۆک و حەلەبچە) و ل نەڤچەیێن دن یێن باشوورێ کوردستانێ، یێن کو مژارا مادەیا 140ێ نە، ریفراندۆما سەرخوەبوونێ ب ئاوایەکی یاسایی و دەمۆکراتیک ل دار کەت.
گەلێ باشوورێ کوردستانێ، تەڤا ھەموو تەھدید، زەخت، ئاستەنگی، ئێریش و پلانێن قرێژ یێن دەرڤە و ناڤخوەیی ژی ب جەسارەت، ب بریارداری و ب خوە باوەرییەکە ب روومەت چوون سەر سندۆقان و %92.73 ژ سەرخوەبوونێ رە گۆتن “ئەرێ”. ئەڤ ھەلوەستا گەلێ مە، ھەروەھا ب رێیێن دەمۆکراتیک راگەهاندنا ئیرادەیەکا مەشرووع یا نەتەوەیی بوو.
د شەشەمین سالڤەگەرا ریفراندۆما سەرخوەبوونێ دە، ئەم ھەم ریفراندۆمێ و ھەم ژی ئەنجامێن وێ ب رێزداری سلاڤ دکن و جارەکە دن رادگهینین کو ئەم پشتگرییێ ل ڤێ ئیرادەیا گەلێ خوە یا رەوا و دیرۆکی دکن.
دەولەتا فەدەرە یا باشوورێ کوردستانێ، بەرھەما کەد، خەبات و تێکۆشینا ھەموو شەھید و خەباتکارێن ھەر چار پەرچەیێن کوردستانێ نە؛ نموونە و نیشانا ئیرادەیا خوەیدارەکرنا گەلێ کوردستانێ یە. ئەم دبێژن لێخوەدیدەرکەتنا ئیرادەیا ریفراندۆما سەرخوەبوونێ و پاراستنا دەستکەفتییێن باشوورێ کوردستانێ ئەرکەکێ نەتەوەیی، نشتمانی یێ ھەموو کوردێن ھەر چار پەرچەیێن کوردستانی و جیھانێ یە.
ئەشکەرەیە کو ھەر ئێریش، دژمناتی و ھەلوەستەکە عەسکەری، سییاسی و راگەھاندنی یا ل دژی دەستھلاتداری و دەستکەفتنێن ھەرێما فەدەرە یا باشوورێ کوردستانێ نە د بەرژەوەندییێن گەلێ مە دە یە، ئەڤ خزمەتا دژمن و خێرنەخوازێن گەلێ کوردستانێ دکن.
ئەم بانگی ھەموو ھێزێن چەکداری و سییاسی؛ ھەموو دەولەتێن جیھانێ و یێن ھەرێمی دکن، دا کو رێزێ ل دەستھلاتداری و سەلاحییەتا مەشرووع یا سەرۆکاتی، حکوومەت، پارلامەنتۆ و ھێزێن پێشمەرگە یێن باشوورێ کوردستانێ و ل بریارێن وان بگرن.
ھێڤی و داخوازا مە ژ پارتییێن سییاسی و ژ سەرۆکاتی، حکوومەت و پارلامەنتۆیا باشوورێ کوردستانێ ئەوە کو ل ئیرادەیە ریفراندۆما 25ێ ئیلۆنا 2017 خوەدی دەرکەڤن و ب تفاق و یەکگرتنەکە نەتەوی، نیشتیمانی ل ھەموو دەستکەفتییێن ھەیی یێن ل باشوورێ کوردستانێ خوەدی دەرکەڤن؛ ھێزا پێشمەرگە و ھەموو دەزگەھێن ھەیی یێن دەولەتبوونێ بکن یەک، پێشدە ببن و دەزگەھێن نوو یێن پێویست ئاڤا بکن.
25/9/2023
نڤێسینگەها راگەھاندنێ یا پارتییا وەلاتپارێزێن کوردستانێ PWK
