یەکیتیا نشتیمانی یا کوردستانێ (یه‌نه‌كه) ئیرۆ ل سلێمانیێ پێنجەمین کۆنگرەیا خوە لدار دخە و هەژمارەک ژ سەرکردەیێن وێ پارتیێ بەشداریێ د کۆنگرەیێ دە ناکن.
د کۆنگرەیا پێنجەمین یا یه‌نه‌كێ دە، 600 ئەندامێن کۆنگرەیێ و هەژمارەک سەرکردە و نوونەرێن پارتیێن سیاسی یێن هەرێما کوردستانێ و ئیراقێ بەشدار دبن.
ل گۆری ئاگاهیان، د کۆنگرەیێ دە هەژمارا ئەندامێن پۆلیتبورۆیێ دێ داکەڤە 10 کەسان، تێ پێشنیارکرن ژی سێ ئەنجوومەن ب ناڤێ ئەنجوومەنا بلندا سیاسی و بەرژەوەندییان، ئەنجوومەنا سەرکرداتیێ و ئەنجوومەنا پشتگریێ بێن ئاڤاکرن.
هەروها هەژمارا ئەندامێن ئەنجوومەنا سەرکردایەتیێ دێ داکەڤە 51 کەسان کو د ناڤ وان دە سەرۆکەک و 50 ئەندام هەنە و ئەنجوومەنا پشتەڤانیێ ژی راستەراست ژ ئالیێ سەرۆکێ یه‌نه‌كێ ب خوە ڤە تێ سەرپەرشتیکرن.
ل گۆر مەدیایا فەرمی یا یه‌نه‌كێ، د کۆنگرەیا پێنجەمین یا یه‌نه‌كێ دە دێ پەیرەو ناڤخوە یا پارتیێ وەرە گوهەرتن و ناڤەندپارێزی د ناڤ پارتیێ دە چەسپاندن.
ئەڤ د دەمەکێ دە یە، هەژمارەک ژ سەرکردەیێن یه‌نه‌كێ بەشداری کۆنگرەیێ نابن، هنەک ژ وان وەک هەلوەست کۆنگرە بایکۆت کرنە و هنەک ژی ئەو کەسن کو رۆژا 8ێ تیرمەهێ ل گەل لاهوور شێخ جەنگی ژ ناڤ رەفێن یه‌نه‌كێ هاتبوون دوورخستن.
پێشتر ژی ئەندامێ ئەنجوومەنا بلندا سیاسی و بەرژەوەندی یا یەکیتیا نشتمانیا کوردستانێ (یه‌نه‌كێ) مەلا بەختیار د پەیامەکێ دە راگەهاندبوو کو ئەو بەشداری کۆنگرەیا پێنجەما پارتیێ نابە.
یەکیتیا نشتمانیا کوردستانێ (یه‌نه‌كه) د 1ێ هەزیرانا 1975ان دە هات دامەزراندن و ژ وێ دەمێ ڤە هەتا نها 4 کۆنگرە ل دار خستنە و کۆنگرەیا داوی ژی د سالا 2019ان دە بوو و بۆ جارا یەکەم سیستەما هەڤسەرۆکاتیێ هات دانین، پشتی 8ێ تیرمەهێ و دوورخستنا لاهوور شێخ جەنگی و هەژمارەک ئەندامێن سەرکرداتیێ، یه‌نه‌كێ سیستەما هەڤسەرۆکاتیێ هلوەشاند.
