د شەر و پەڤچوونێن د ناڤبەرا ھێزێن سووریەیا دەمۆکراتیک (هەسەدێ) و چەکدارێن خوەجھی دە، ھەری کێم 118 کەس ل رۆژھلاتێ دێرازۆرێ ھاتن کوشتن.
رەوانگەھا سووری یا مافێن مرۆڤان (SOHR) راگھاند، د شەر و پەڤچوونێن د ناڤبەرا هەسەدێ و چەکدارێن خوەجھی دە کو مەھەکە ل گوندەوارێ رۆژھلاتێ دێرازۆرێ دەست پێ کریە، 29 چەکدارێن ھەسەدێ و 79 چەکدارێن خوەجھی، ھەروھا 10 سڤیل ھاتنە کوشتن.
شەر و پەڤچوون د ناڤبەرا ھێزێن سووریەیا دەمۆکراتیک (ھەسەدێ) و چەکدارێن سەرۆکێ ئەنجوومەنا لەشکەری یا دێرازۆرێ ئەبوو خەولا دە، ژ 27 تەباخا بۆری ڤە دەست پێ کرنە.
ھەسەدێ رۆژا 4 ئیلۆنێ دە ژی د داخویانیەکێ دە راگھاند، “کەسێ ب ناڤێ ئیبراھیم ئەل-حەفل، سەرۆکێ فتنەیێ یە و ئێدی ژ ئالیێ ھێزێن وان ڤە تێ خوەستن، ژ بەر کو ئەو بوویە سەدەما رژاندنا خوینا شەرڤان و خەلکێ و ل گۆری فەرمانێن ئالیێن دەرڤە سەرکێشیا ھەولدانێن دەرخستنا فتنەیێ دکە.”
پێر 26 ئیلۆنێ ھەژمارەک ژ چەکدارێن خوەجھی یێن سەر ب رێژیما سووریێ ڤە ژ رۆژئاڤایێ چەمێ فراتێ، ژ ناڤچەیێن د بن کۆنترۆلا میلیشیایێن ئیرانێ دە دەرباسی گوندەوارێ زیبانێ ل رۆژھلاتێ دێرازۆرێ بوون و شەر و پەڤچوون د ناڤبەرا وان و ھەسەدێ دە دەرکەتن.
رەوانگەھێ ئیرۆ دا زانین، ھەسەدێ کاری ب سەدان چەکدارێن کو ژ دەڤەرێن د بن کۆنترۆلا میلیشیایێن ئیرانی دە دەرباسی ئالیێ رۆژھلات چەمێ فراتێ ببن دوور بخە.
فەرماندارێ گشتی یێ ھەسەدێ مەزلووم عەبدی رۆژا 24 ڤێ مەھێ د ھەڤپەیڤینەکێ دە لگەل کۆڤارا “ئەل-مەجلا” دە دەربارێ ئالۆزیێن ل دێرازۆرێ دە راگھاند، ھەڤرێزیەکە زەلال د ناڤبەرا شام و تەھرانێ دە ھەیە، ترکیە ژی ب پشتگریا کۆمێن چەکدارێن سووری کەت سەر ڤێ خەتێ، لێ ئەو ھەر سێ وەلات ب سەر نەکەتن و “رەوش نھا ئارام بوویە.”
