ترکیێ بەرپرسەکێ په‌كه‌كێ ل قامشلۆ كوشت

ترکیێ کوشتنا بەرپرسەکی په‌كه‌كێ د ئۆپەراسیۆنەکێ دە ل باژارێ قامشلۆ یێ رۆژئاڤایێ کوردستانێ رادگهینە.

ل گۆر ئاژانسا «ئانادۆلو»، دەزگەها هاوالگیری یا ترکیێ (میت) ل باژارێ قامشلۆ ل دژی په‌كه‌كێ ئۆپەراسیۆنەکە تایبەت کریە و بەرپرسێ په‌كه‌كێ یێ ژ ئاساییشا گشتی ب ناڤێ (مووزدەلیف تاشکن) یێ ب ناڤێ كۆد (ئاسلان چەلە/ئاسلان سامورا) کوشتیە.

دیار کر ژی، میتێ ل سەر رێیا قامشلۆ-عاموودێ چالاکیەک ل دار خست و تێ دە مووزدەلیف تاشکن بێباندۆر کریە.

هات راگهاندن، مووزدەلیف تاشکن پلاندانەرێ ئێریشا ئۆرامارێ یا د سالا 2007ان دە یا ل دژی ئارتێشا ترکیێ هاتبوو کرن بوو کو د ئەنجامێ دە، 12 لەشکەر هاتن کوشتن و 16 لەشکەر ژی بریندار بوون.

پێشتر ناڤەندا راگهاندنێ یا هێزێن ئەولەکاریا هوندرین رۆژا 18ێ ئیلۆنا بۆری د داخویانیەکێ دە راگهاندبوو، درۆنەکە ترکیێ ئۆتۆمۆبیلەک ل سەر رێیا قامشلۆ – عاموودێ کر ئارمانج و د ئەنجامێ دە 2 ئەندامێن ئاساییشێ ژیانا خوە ژدەست دان.