هێزەکە ئەولەهیێ ل باژارێ کەرکووکێ ل سەر مالا بەردەڤکێ ڤەلڤینا نەوەی نوێ دە گرت و د ناڤا مالا وی دە و ل بەر چاڤێ مالباتا وی ل وی خست، سڤکاتی ل وی کر و پشترە ژ مالێ دەرکەتن.
ل گۆر ئاگاهیێن تایبەت یێن پێگەها دارکا مازی، سەرێ سبەها 13/9/2023 ل تاخا رەحیماوا یا باژارێ کەرکووکێ، چار چەکدارێن جل رەش چوونە سەر مالا هیمداد شاهین یێ بەردەوڤکێ ڤەلڤینا نەوەی نوێ کو دخوازە د هلبژارتنێن ئەنجوومەنێن پارێزگەهێن ئیراقێ دە وەکە سەرۆکێ لیستا ڤەلڤینا نەوەی نوێ بەشدار ببە.
هەر وەها ئەشکەرە کرن، چەکداران ب ئاوایەکی هەری توند ل بەر چاڤێن هەر یەک ژ خووشک و بابێ وی ل هیمداد شاهین خستیە، مالباتا وی ژ چەکداران رە راگهاندیە کو ئەو دزانن ئەڤ چەکدارێن هێزا رەش یا سەر ب یەنەکێ نە کو ئاسوو مامەند سەرپەرشتیا وان دکە و دێ سکالایێ ل دژی وان تۆمار بکن. لێ بەلێ، پاش کو ل وی هاتیە خستن و ئەو هاتیە سڤکاتیکرن چەکدار ژ مالا وی دەردکەڤن و ئەڤ مژار تێ ڤەشارتن.
چاڤکانیێن دارکا مازی تەکەز کرن، پاش ڤێ بوویەرێ هیمداد شاهین چوویە بنگەهێ پۆلیسێن رەحیماوا و بێی کو ناڤێ چ ئالیەکێ بینە سکالا تۆمار کریە.
هیمداد شاهین ب کەسەکی زمان درێژ و پڕبێژ ل باشوورێ کوردستانێ تێ ناسکرن، ئەو ل سەر هەر تشتی دپەیڤە و داخویانیان ددە، دەرەوان دکە و ل دژی حکوومەتا هەرێمێ دپەیڤە، لێ بەلێ ژ ترسا هێزا رەشا یەنەکێ تەڤی کو ل وی خستیە و سڤکاتی ل وی و مالباتا وی کریە هەیا نها ئەڤ مژار د راگهاندنێ دە باس نەکریە، مەدیایا ڤەلڤینا نەوەی نوێ ژی ئەڤ مژار پاش گوهـ کریە و هەیا نها ئەشکەرە نەکریە.
