حەیدەر شەشۆ: بەرژەوەندیا ھندەک ئالیان د جیبجیکرنا رێکەفتنا شنگالێ دە نینە

فەرماندەیێ ھێزا پاراستنا ئێزیدخانێ حەیدەر شەشۆ دوور دبینە کو رێکەفتنا شنگالێ یا د ناڤبەرا حکوومەتا ھەرێما کوردستانێ و ئیراقێ دە، د دەمەکە نێزیک دە وەرە جیبجیکرن.

سێ سال ب سەر ئیمزەکرنا رێکەفتنا شنگالێ رە دەرباس دبن، لێ ھەتا نھا چ خالێن رێکەفتنێ ژ ئالیێ بەغدایێ ڤە ژ بۆ ئاساییکرنا رەوشا شنگالێ نەھاتنە جیبجیکرن.

حەیدەر شەشۆ دەربارێ ئاستەنگیێن ل پێش رێکەفتنێ گۆت: “نھا بەشەک ژ ئالیێن کو رێکەفتنا شنگالێ ئیمزە کرنە، ناخوازن ئەو بکەڤە وارێ جبجیکرنێ، ژ بەر کو رەوشا نھا یا شنگالێ د بەرژەوەندیا وان دەیە.”

گۆت ژی: “ئەگەر رێکەفتنا شنگالێ بهێت جیبجیکرن، دێ ھندەک ئالی زرارێ ببینن، گەلەک کەس ژی دێ بێن دادگەهکرن و حەساب ژ وان بێ پرسین، لەوما ئەز باوەر دکم د دەمەک نێزیک دە رێکەفتن نایێ جیبجیکرن.”

رۆژا 18/5/2023، نوونەرا تایبەتا نەتەوەیێن یەکگرتی ل ئیراقێ پلاسخارتێ، د جڤینا ئەنجوومەنا ئاسایشا ناڤدەولەتی دە دەربارێ رەوشا ناڤچەیێن کوردستانی و شنگالێ دە گۆتبوو: “ل شنگالێ ئالیێن جودا ھەنە کو رێ ل بەر جیبجیکرنا رێکەفتنێ دگرن و دڤێت رێڤەبەریەکە باش و ئەولەھی و ئارامی ژ بۆ شنگالێ بێ ڤەگەراندن.”

حەیدەر شەشۆ د وێ باوەریێ دەیە کو جیبجیکرنا رێکەفتنا شنگالێ نە ئەوقاس زەحمەتە وەک کو پلاسخارتێ د جڤینا ئەنجوومەنا ئاساییشێ دە بەحس کریە و گۆت: “نەتەوێن یەکگرتی ژ بۆ جیبجیکرنا رێکەفتنا شنگالێ جدی نەبوویە و ژ بۆ جیبجیکرنا وێ ژی وەک پێویست فشار ل ئالیێن رێکەفتنێ نەکریە.”

رۆژا 9 جۆتمەھا 2020 حکوومەتا ئیراقێ و حکوومەتا ھەرێما کوردستانێ ل بەغدایێ ب چاڤدێریا سەرۆکوەزیرێ بەرێ یێ ئیراقێ مستەفا کازمی رێکەفتنا شنگالێ ئیمزە کربوون کو ژ 6 خالان پێک تێ:

1. ھلبژارتنا قەیمەقامەکی نوو.

2. حکوومەتا فەدەرال ئیدارەیا پرسگرێکێن ئەولەھیێ دکە.

3. ئەرکدارکرنا 2500 کەسان ژ شنگالێ و پەنابەرێن وێ و ئاڤاکرنا ھێزەکە نوو.

4. پەکەکە و ھەموو کۆمێن پێ ڤە گرێدایی ل شنگالێ نەمینن.

5. دڤێت چ ئەندامێن پەکەکێ د ناڤا ھێزا نوویا ئەولەھیێ دە نەین گرتن.

6. دڤێت ھەولێر و بەغدا ھەماھەنگیێ ژ بۆ ئاڤەدانکرن و برێڤەبرنا شنگالێ بکن.