د بۆمبەبارانا ئارتێشا ترکیەیێ یا ل سەر ناڤەندەکە ھێزێن ئەولەکاریا ھوندرین (ئاسایش) ل دێرکێ دە، 29 ئەندامێن ئاسایشێ ھاتن کوشتن و 28 ئەندام ژی بریندار بوون.
رێڤەبەریا خوەسەر یا ل رۆژئاڤایێ کوردستانێ ئیرۆ 9 جۆتمەھێ د داخویانیەکێ دە راگھاند کو د ئێریشێن داویێ یێن ئارتێشا ترکیەیێ ل سەر گوندێن دێرکێ و رمێلانێ دە، 29 ئەندامێن ھێزێن تێکۆشینا دژی مادەیێن ھشبەر ھاتن کوشتن و 28 ژی بریندار بوونە.
وێ داخویانیێ ئاماژە دایە وێ یەکێ کو “ئارمانج ژ وان ئێریشان دەرخستنا تەڤلھەڤیێ و رێگرتنا ل تێکۆشینا گەل و ھێزێن مەیێن لەشکەری و ئەولەکاریێ یێن ل دژی تەرۆرێیە”.
ھەروەسا وێ داخویانیێ ئاماژە دایە ئێریشا ل سەر جھێن پەترۆلێ و ھەرێمێن سڤیلان و ئاکادەمیا تێکۆشینا دژی مادەیێن ھشبەر و دبێژە: ڤێ ئاکادەمیێ 24 دەمژمێران ژ بۆ پاراستنا جڤاکێ ژ باندۆرا مادەیێن ھشبەر کار دکر.
ھەروەسا د داخویانیێ دە بێدەنگیا ناڤنەتەوەیی ل بەرانبەری کریارێن ترکیەیێ شەرمەزار کر و گۆت، “ئەڤ بێدەنگی و پاشگوھکرن زۆردەستیا رەژیما فاشیست زێدەتر دکە”.
ل داویێ ژی رێڤەبەریا خوەسەر 3 رۆژ وەک شین راگھاند.
ئارتێشا ترکیەیێ ژ رۆژا 5 جۆتمەھێ ڤە ناڤچەیێن جودایێن رۆژئاڤایێ کوردستانێ بۆمبەباران دکە، د ئەنجامێ دە زیانێن جانی و مادی دەرکەتنە.
