بووبێ ئەسەر
کەمالیزم ل سەر قرکرن، تالانکرن و وێرانکرنا گەلێ کورد ھاتیە ئاڤاکرن. ئەڤ کەمالیزما کو ناخوازە ناڤێ کورد ل چ جھەکی بێ بھیستن، تم د ناڤا خەباتێ دە یە. ھندەک ژ ڤان خەباتان جارنا ئەنجام ژی دایە. لێ ھندەک جاران ژی ئەو داخواز و تەھدیدا وێ وەکە برووسکەکێ ل سەروچاڤێن وێ کەتیە.
دەما ل سوێدێ زارۆکخانەیا کوردی ڤەبوو، کاربدەستێن ترکان دین و ھار بووبوون. نامە ل سەر نامێ، تەھدید ل سەر تەھدیدان ژ بۆ سوێدیان شاندن، دا کو ئەو زارۆکخانە بهێت گرتن، لێ پەرە نەکر و ئەو زارۆکخانە هێژ ژی ل ستۆکھۆلمێ خزمەتا زارۆکێن کوردان دکە.
دەما ل ئەلمانیێ و ب پێشەنگیا کۆمکارێ د 6-7-8ێ خزیرانا 2023 دە ل باژارێ کۆلنێ ب ناڤێ “جگەرخوین پێشانگەھا پرتووکان یا کوردی” دا بھاتا ڤەکرن، (ئەڤ پێشەنگەهـ ب ئاوایەکی سەرکەتی پێک ھات) کاربدەستێن ترکان دیسا ڤالا نەسەکنین و خوەستن وێ ژی تێک ببن، لێ دیسا ژی ب سەر نەکەتن. دیارە کو ئێدی ئەوێ ب سەر نەکەڤن ژی. وەھا خویا یە ژ نھا و پێدە دۆر دۆرا مە کوردانە کو ئەم د بریار و کریارێن خوە یێن د بەرژوەندیا وەلاتێ مە دەنە ب سەر دکەڤن.
ڤێ کەمالیزما کو ناھێلە ئەم ناڤێن ب کوردی ل کوچک و دەوارێن خوە ژی بکن، ب ھەزاران مرۆڤێن مە کوشتنە، سەریھلدانێن مە تێک برنە، قەتل و وێرانکرنێن مەزن کرنە کو کورد تم ژ وان ب ترس بە. لێ کوردان ژی چ جاران ژ بەر وان دانەخواریە و تم ل ھەمبەری ڤێ سازوومانا ل سەر قرکرنا مە ھاتیە ئاڤاکرن، تەکۆشین دانە و ددن.
لێ چ مخابن کو ئاپۆیێ ژ بۆنا ئازادکرنا ھەر چار پەرچێن کوردستانێ(!) دەرکەتبوو مەیدانێ، گەلەکی ژ ڤێ کەمالیزمێ حەز دکە، نھا ژی دخوازە وێ ب کوردان ژی بدە قەبوولکرنێ کو ئەو تشتەکی باشە. دێ ئەڤجا وەرن ل ڤی حالی و ل ڤێ عەجێبیێ بنێرن و نەکن گازی. ما چاوا دبە کو ئەو ئایدۆلۆژیا کورد قەتل کرنە، کوشتنە، داردەکرنە، ژ بۆنا کوردان باش بە. ما نە شەر و تەکۆشینا مە ل ھەمبەر وێ یە.
ل گۆر من ئەڤ دیمەنێ داوی یێ سەناریۆیا کو ژ دەستپێکێ دە ھاتبوو نڤیساندنێ یە. ل گۆر وێ دبە د پەردا داوی دە کوردان بکن، کەمالیست. ئەگەر ئەڤە نەبە دێ ھەول بدن کو وێ ب کوردان شرین بکە. ژ خوە دەما ئەو کەمالیزما کو ئەوقاسی کینا وێ کەتیە دلێ مە کوردان، ب مە شرین ببە، وێ دەمێ ژی دێ ل باکورێ کوردستانێ ئێدی چ تەکۆشین ل ھەمبەر وێ نەیێ دایین. ئەو ژی تێ واتەیێ کو ئێدی کورد، دێ ترکان ھم خالانێن خوە بزانبن و ھم ژی دێ وەکە برایێ خوەیێ مەزن وی بناسن. رامانا ڤێ ژی ئەڤەیە کو ئێدی کورد ل باکورێ کوردستانێ وەکە نەتەوەکی نەمینە.
لۆما ژی نھا ھەمی خەبات و جھدا سەرۆکێ پەکەکێ/کادەکێ عەڤدلا ئەوە کو ڤێ کەمالیزمێ ب کوردان شرین نیشان بدە. ھەر وەھا دخوازە بدە دیارکرن کو ئەو سەرھلدانێن ل ھەمبەرێ کەمالیزمێ رابوونە، پاشڤەروو بوون. ژ بەر ڤێ یەکێ یە کو ھەتا ژ مە بهێت دڤێت ئەم دژمناتیا خوە لگەل کەمالیزمێ باژۆن و خورتر بکن. ژ بۆنا رووخاندنا ڤێ سازوومانێ چ ژ مە بێ دڤێت ئەم وەکە کورد بکن. قەبوولکرنا کەمالیزمێ، وەنداکرنا کوردانە.. دڤێت بێ زانین کو ھەتا ل ترکیێ دەستھلاتیا وێ ھەبە، چارەسەرکرنا مەسەلا نەتەوا کورد زەحمەتە.
دەما نوو ھەژمار: 55/2003
تێبنی:
بەلێ خوەندەڤانێن عەزیز من تام 20 سال بەرێ ئەڤ نڤیسی بوو. رەوشا نھا بفکرن کوردێن باکور چاوا ژ کەمالیزمێ حەز دکن و د ھەر واری دە پشتگریا وان ئانکو پارتیا وێ یا بناڤێ جەهەپێ دکن. نھا بێدەنگیا رەوشەنبیرێن کورد ل باکورێ کوردستانێ ژ بەر حەزکرنا کەمالیزمێ یە. کەمالیزما کو کاربدەستن ترکان ب شەر و کوشتنێ نکاریبوون ب کوردان بدن شرینکرن ئەڤ ب دەستێ پەکەکێ ھاتە مسۆگەرکرن کو پرانیا کوردان بوونە حەژێکەرێن کەمالیزمێ و بێدەنگیا مەزن یا رەوشەنبیرێن باکورێ کوردستانێ ژ بەر ڤێ یە.
دەمەکێ پەکەکێ ناڤێ خوە کربوو کادەک ئەڤ نڤیس ژی وێ دەمێ ھاتبوو نڤیسین.
