ژ بەر بۆمبەبارانا ئارتێشا ترکیێ ل سەر سەنتەرالا ئەلەکتریکێ یا ل قامشلۆ، وەستگەها ئاڤێ یا ئەلۆکێ بێ ئەلەکتریکە و راوەستیایە، هشیاری ژ دەرکەتنا کارەساتەکە مرۆڤی تێ دایین.
ژێدەرا سەرەکە یا ئاڤا ڤەخوارنێ یا باژارێ حه‌سه‌كێ و گوندەوارێ وێ ڤە، ژ وەستگەها ئەلۆکێ یا ل سەرێکانیێ یە کو ژێدەرا تەکانە یا ئەلەکتریکا وێ ژی ژ ناڤچەیێن رێڤەبەریا خوەسەرە، ژ بەر کو ئارتێشا ترکیەیێ بەری چەند رۆژان سەنتەرالا ئەلەکتریکێ یا قامشلۆ بۆمبەباران کر و ژ کار دەرکەت، وەستگەها ئەلۆکێ بێ ئەلەکتریک مایە و راوەستیایە.
هەروها وەستگەها بەنداڤا رۆژئاڤا ژی ژ بەر بۆمبەبارانا ئارتێشا ترکیێ گەلەک زیان دیتیە و ژ کار دەرکەتیە، کو ئەو بەنداڤ ژێدەرا ئاڤا ڤەخوارنێ یا تاخێن رۆژئاڤایێ حه‌سه‌كێ یە.
ژ بەر قوتبوونا ئاڤێ ژ 5ێ ڤێ مەهێ ڤە، هشیاری ژ کارەساتەکە مرۆڤی یا مەزن تێ دایین؛ ژ بەر کو زێدەتری 1.5 ملیۆن کەس ل حه‌سه‌كێ ژ ئاڤێ بێپار مانە، خەلکێ باژارێ ژی نەچارن کو ئاڤا ڤەخوارنێ ب تانکەران و ب نرخێن کو ژ کارینێن وان گرانتر بکرن.
وەلاتیێن حه‌سه‌كێ ل سەر ڤێ یەکێ بانگ ل سازیێن ناڤدەولەتی و هەرێمی دکن کو دەستێوەردانێ بکن و سازیێن سڤیل و یێن خزمەتکاریێ ژ شەر دوور بخن.
ئارتێشا ترکیەیێ ژ رۆژا 5ێ جۆتمەهێ ڤە ناڤچەیێن جودایێن رۆژئاڤایێ کوردستانێ، سازیێن خزمەتکاریێ، وەستگەهێن ئەلەکتریک و ئەنەرژیێ، ناڤەندێن هه‌سه‌دێ و ئاساییشێ بۆمبەباران دکە، د ئەنجامێ دە ژی ژ بلی زیانێن جانی، گەلەک زیانێن مادی دەرکەتنە و وەلاتی بێ ئەلەکتریک و ئاڤ مانە.
