وەزیرێ کارێن ناڤخوە یێ هەرێما کوردستانێ رێبەر ئەحمەد گۆت، «په‌كه‌كه ل بەر رێکەفتنا شنگالێ دبە ئاستەنگ».
فۆروما ئەنستیتویا لێکۆلینان یا رۆژهلاتا ناڤین (میری)، ب سپۆنسۆریا تۆرا مەدیایی یا رووداوێ، ل هەولێرێ ب رێ ڤە چوو.
رێبەر ئەحمەد، د رۆژا دویەم یا فۆرومێ دە بەشداری پانێلا ب ناڤێ «رێکەفتنا شنگالێ: پێشڤەچوون و ئاستەنگ» بوو.
شێورمەندێ ئاسایشا نشتیمانی یا ئیراقێ قاسم ئەل-عەره‌جی و ئالیکارێ سەرۆکێ یونامی كلاودیۆ جۆردۆنه ژی د هەمان پانیلێ دە ئاخڤین.
ئەحمەد دا زانین کو حکوومەتا ئیراقێ ژ بۆ کوردێن ئێزدی یێن کو ل کامپێن هەرێما کوردستانێ دژین بەرپرسیاریێن خوە نایینە جهـ.
رێبەر ئەحمەد، بال کشاند سەر رەوشا شنگالێ و گۆت: «گەلەک سۆزێن کو هاتبوون دایین نەهاتن گرتن. هەتا نها ژی 300 هەزار کوردێن ئێزدی ل کامپێن هەرێما کوردستانێ دژین».
هه‌ر وها دیاركر، پرسگرێکێن وان و ئیراقێ هەنە چمکی ئەو ئیرادەیا وان نینە کو رێکەفتنێن سیاسی ژی ب جهـ بینن».
ئەحمەد دەستنیشان کر کو رێکەفتنا شنگالێ هەر کو دچە تەڤلیهەڤ دبە و دا زانین: «په‌كه‌كه ل بەر رێکەفتنا شنگالێ دبە ئاستەنگ. هەکە په‌كه‌كه و گرووپێن دن یێن چەکدار ژ شنگالێ نەیێن دەرخستن، دێ حکوومەتا ئیراقێ، ئێزدی، خەلکێ سڤیل و هەژار بەردێلا نەئارامی و نووژەننەکرنا شنگالێ بدن».
