گرۆپێن چەکدار یێن ئۆپۆزیسیۆنا سووریێ یێن لگەل ئارتێشا ترکیەیێ ھەرێما عەفرینێ داگیر کرنە، 3 خۆرتێن کورد رەڤاندن.
رێخستنا مافێن مرۆڤان ل عەفرینێ د راپۆرەکێ دە بەلاڤ کر، چەکدارێن گرووپا “فەیلەق ئەل-شامێ” رۆژا 7 جۆتمەھێ کەسێ ب ناڤێ وەقفی ئەحمەد کوردی ژ باژارۆکێ جندرێسێ رەڤاند و بر گرتیگەھا ل گوندێ ئیسکا.
دیار کر ژی، وەقفی ئەحمەد کوردی د دەستپێکا ڤێ مەھێ دە ژ ھەرێما شەھبایێ یا ل باکورێ حەلەبێ ڤەگەریابوو عەفرینێ.
رێخستنا مافێن مرۆڤان دا زانین ژی، چەکدارێن گرۆپا “پۆلیسێن لەشکەری” رۆژا 5 جۆتمەھێ خۆرتێ ب ناڤێ ئەحمەد حوسێن حەسەن ژ تاخا ئەشرەفیێ یا عەفرینێ رەڤاند.
دا زانین ژی، ئەحمەد حوسێن حەسەن د دەما داوی دە ڤەگەریابوو عەفرینێ و دەما ناسنامەیا خوە ژ ئەنجوومەنا خوەجھییا عەفرینێ دەردخست ژ ئالیێ چەکداران ڤە ھات رەڤاندن.
ھەروھا راگھاند ژی، چەکدارێن “پۆلیسێن لەشکەری” یێن باژارێ عەزازێ خۆرتێ ب ناڤێ عەلی حەمۆ بیلال ژ رێبەندا عەزازێ رەڤاند کو لگەل ھەڤژین و کورێ خوە ژ حەلەبێ ڤەدگەریان گوندێ خوە “خلالکا” و ھەتا نھا چارەنڤیسا وی نە دیارە.
ھەرێما عەفرینێ ژ ئادارا 2018 ڤە ژ ئالیێ ئارتێشا ترکیێ و گرۆپێن چەکدارێن سەر ب وێ ڤە ھاتیە داگیرکرن و ھەتا نھا دۆرا 9 ھەزار کەسان ھاتنە رەڤاندن کو چارەنڤیسا ھەژمارەکا مەزن ژ وان نایێ زانین.
