قایمەقامێ قەزا رەواندزێ راگەھاند، ژ بەر کو بنکە و بارەگەھێن پەکەکێ ل نێزیکی گوندێن بنارێ قەندیل و سینۆرێ وەرتێ هەنە و تەڤگەرا وان لێ ھەیە، هەر تم مەترسیا بۆمبەبارانێن ترکیێ ل سەر خەلکێ هەیە و ژ بەر وێ ژی د چەند سالێن بۆری دە ل وی سینۆری ھەژمارەک ھەموەلاتی بوونە قوربانی.
قایمەقامێ قەزا رەواندزێ ئەحمەد قادر راگەھاند: “گوندێن بنارێ قەندیل و سینۆرێ ناحیەیا وەرتێ، بنکە و بارەگەھێن پەککەێ لێ نێزیکن، گەلەک جاران پرسگرێکا ژ بۆ خەلکێ چێدکن، چ ب وەرگرتنا باجا ب زۆرێ بە، چ ژ بەر بۆمبەبارانێن ترکیێ بە، مخابن ھەموەلاتی د ترسێ دە نە و مەترسی ژ بۆ وان چێدبە. سالێن بۆری و ئیسال ژی ژ بەر بۆمبەبارانان خەلک بوونە قوربانی.”
ھەروەھا گۆت: “د سالا 2023 دە گەلەک جاران ئەو ناڤچە ھاتنە بۆمبەباران کرن و زیانێن جانی و مادی گەھەشتینە خەلکێ دەڤەرێ. ژ ئالیەکی دن ڤە ژی پەکەکە بوویە سەدەم کو دەستێ ئاڤادانیێ نەگەھە ھەژمارەک گوندان و ھەتا نھا وەکی کو ھاتیە دیار کرن 6 گوند د مەترسیێ دە نە.”
قایمەقامێ رەواندزێ گۆت: “ئەو ناڤچە خوەدی سروشتەک جوانن، لێ ژ بەر تەڤگەرا پەکەکێ و نەسەقامگیریا ل وان گوندان، گەشتیار نکارن سەردان بکن و وەک ناڤچەیا گەشتیاری سوود لێ نایێ وەرگرتن.”
