ل شرنەخێ د چارچۆڤەیا ئۆپەراسیۆنێن ل دژی په‌كه‌كێ دە، هەتا 15 رۆژان ژ چوونووهاتنێ رە هاتە قه‌ده‌غەکرن. ل مێردینێ ژی هەر جورە چالاکی و خوەنیشاندان هاتن قه‌ده‌غەکرن.
پارێزگاریا شرنەخێ راگهاند، دۆرووبەرا چیایێ جوودی، چیایێ گابار، بەستا و فەراشینێ هەتا 15 رۆژان وەکی هەرێمێن ئەولەکاریێ یێن تایبەت هاتنە راگهاندن.
پارێزگاریا دیار کر ژی، ژ بۆ پاراستنا مال و جانێ وەلاتیان، چوونووهاتن ل وان ناڤچەیان هاتیە قه‌ده‌غەکرن.
ژ ئالیەکی دن ڤە پارێزگەها مێردینێ ژی ب داخویانیەکێ ئەشکەرە کر، هەر جورە چالاکیێن وەک خوەنیشاندان، مەش، جڤینێن گرسەیی و جڤینێن رۆژنامەڤانی هەتا هەفت رۆژان هاتنە قه‌ده‌غەکرن.
بەری نها ژی پارێزگەهێن دێرسم، چه‌ولیگ و دیاربەکرێ هەر جورە چالاکی و خوەنیشاندانان قه‌ده‌غە کربوون.
ئەڤ بریار د دەمەکێ دە تێن گرتن، پارتیا دەمۆکراتیکا گەلان و پارتیا چەپا کەسک ئەڤ چەند رۆژن ل گەلەک باژارێن باکورێ کوردستانێ ل دژی ئۆپەراسیۆنێن ترکیەیێ یێن ل سەر رۆژئاڤایێ کوردستانێ خوەنیشاندانان دکن.
