ژ بەر تۆپباران و بۆمبەبارانا ژ ئالیێ هێزێن ترکیێ و گرووپێن چەکدار ڤە، 12 گوندێن تل تەمرێ ل پارێزگەها حه‌سه‌كێ ڤالا بوونە.
رەوانگەها سووری یا مافێن مرۆڤان (سۆهر) بەلاڤ کر، ژ بەر تۆپباران و بۆمبەبارانا ژ ئالیێ ترکیە و گرووپێن چەکدارێن سەر ب وێ ڤە، 12 گوندێن ل سەر خەتێن پێوەندیێ ل گوندەوارێ تل تەمرێ ل باکورێ رۆژئاڤایێ حه‌سه‌كێ ب تەمامی ڤالا بوونە.
دا زانین ژی، ژ بەر بەردەوامیا تۆپباران و شەرێ د ناڤبەرا وان هێزێن سەر ب ترکیێ ڤە و شەرڤانێن هه‌سه‌دێ دە، گوندیێن نێزیکی 60 گوندێن دن یێن ل سەر خەتێن پێوەندیێ ل گوندەوارێن ئەبوو راسێن و تل تەمرێ ژی د ناڤا ترس و خۆفێ دە دژین.
ئاماژە ب وێ دا، ب سەدان مالباتێن دەربدەر بێ مال مانە، هنەک ژ وان ل دەرڤە رادزێن و پشتی کو تۆپباران رادوەستە ڤەدگەرن مالێن خوە، ژ بەر کو ت پەناگەهەکە دن یا ئارام ژ وان رە تونەیە، هنەک ژ وان ژی بەرێ خوە ددن دبستان و کامپێن ل هەرێمێن دووری بۆمبەبارانێ.
ژ بلی پرسا کۆچبەری و دەربدەریێ، ئەنجامێن دن یێن نەیینی دەردکەڤن، کو ب هەزاران خوەندەکار ژ خوەندنێ بێپار دمینن، هەروها رێژەیا بێواری و بێکاریێ ژی زێدە دبە.
ئارتێشا ترکیەیێ ژ پشتی تەقینا ل ئەنقەرەیێ، ژ رۆژا 5ێ جۆتمەهێ ڤە ناڤچەیێن جودا یێن رۆژئاڤایێ کوردستانێ، سازیێن خزمەتکاریێ، وەستگەهێن ئەلەکتریک و ئەنەرژیێ، ناڤەندێن هه‌سه‌دێ و ئاسایشێ بۆمبەباران دکە، د ئەنجامێ دە ژی ژ بلی زیانێن جانی، گەلەک زیانێن مادی دەرکەتنە.
