هێزەکە ئیراقی ئیرۆ 16.10.2023ان سەربازگەها لەشکەری یا تۆپزاوا یا کەرکووکێ کو سەمبۆلا تاوانێن ئەنفال و ژەنۆسیدێ یە، داگیر کر.
د سەردەما ئەنفالێ دە، رەژیما بەعس خەلکێ دەڤەرێ دبرن ڤێ بارەگەها لەشکەری و پشترە ژی ئەو ژ بۆ چۆل و بیابانێن سەماوا و دەڤەرێن دن یێن باشوورێ ئیراقێ دشاندن.
پێشتر شێنیێن گوندێ تۆپزاوا داخواز کربوون ئەو بارەگەها لەشکەری نەیێ داگیرکرن، ژ بەر کو ئەو وەک سەمبۆلا ئەنفالێ و هۆڤیتیا ره‌ژیما بەرێ یا بەعس ل گوندێ خوە دبینن و داخواز کربوون کو ببە مووزەخانە.
چالاکڤان هێمن حه‌سیب ژ كوردستان 24 رە گۆت: «ئەو دیمەنێن کو ئەم ئیرۆ ل سەربازگەها ئەنفالێ دبینن، هەمان دیمەنن کو ره‌ژیما بەعس د سالا 1988ان دە ل ڤر کربوون. نها ئارتێشا ئیراقێ هاتیە وێ جهێ کو بوویە سەمبۆلا زولم و زۆرداریا ره‌ژیما بەرێ یا ئیراقێ ل هەمبەر وەلاتیان، داگیر دکە».
هەروها گۆت: «ئەڤ کریارێن ئارتێشا ئیراقێ ل تۆپزاوایێ، بەردەوامیا سیاسەتا 16ێ جۆتمەهێ و لەشکەریکرنا پارێزگەها کەرکووکێ یە».
پەیامنێرێ ک24ێ ل کەرکووکێ ژی گۆت، پشتی هاتنا هێزێن ئیراقی بۆ سەربازگەها لەشکەری، خەلکێ گوندێ تۆپزاوا وەک نەرازیبوون ل سەر ڤێ یەکێ، دەست ب خوەپێشاندانێ کرن و رێیا سەرەکە یا گوند گرتن.
ئەنفال، یەک ژ تاوانێن هەری مەزنێن ل دژی مرۆڤاهیێ یە کو ژ ئالیێ ره‌ژیما بەعس یا رووخاندی ڤە ل دژی گەلێ کورد هاتیە کرن. د ژەنۆسیدا ئەنفالێ دە ره‌ژیما بەعس زێدەتر 182 هەزار کورد ل باژار و گوندێن کوردستانێ ئەنفال کرن و 4 هەزار و 500 گوندێن کوردستانێ وێران کرن.
