پشتی خیانەتا 16 ئۆکتۆبەرا 2017، پرۆسەیا عەرەبکرنا کەرکووکێ بەرفرەھتر بوو، کورد ژ رێڤەبەریا کەرکووکێ ھاتنە دوورخستن و وان چ رۆلەکێ لەشکەری و ئیداری نەمایە.
ئیرۆ شەشەمین سالڤەگەرا خیانەتا 16 ئۆکتۆبەرێ یە. کەرکووک ھێژ ژی د بن دەستھلاتداریا لەشکەری دەیە، رۆژەک دەرباس نابە کو ل باژێر پێڤاژۆیا عەرەبکرنێ نەیێ کرن.
ل باژێری رەوشەکا نەباشا ئەولەھیێ ھەیە و کورد ژ ئیدارەیا کەرکووکێ ھاتنە دوورخستن و رێڤەبەریەکا سەپاندی ئەڤە شەش سالن باژاری برێڤە دبە. تەڤی کو کورد پرانیا خەلکێ پارێزگەھێ نە، لێ چ رۆلا وان یا ئیداری و لەشکەری نینە.
د 6 سالێن بۆری دە یەک ژ ھەولێن رێڤەبەریا سەپاندی یا کەرکووکێ ئەو بوو کو ناسنامەیا کوردایەتیێ یا باژێری بگوھەرە. تشتێ کو نھا ل باژێری تێ دیتن، وەکو وێ یەکێ یە کو چ کورد ل کەرکووکێ نەمابن.
بازرگانێ کەرکووکی محەمەد ئیسماعیل کو ل بازارا سەرەکەیا کەرکووکێ کار دکە، دبێژە: “بەری خیانەتا 16 ئۆکتۆبەرێ و دەما دەستھلاتداریا کوردان، ل باژێری رەوشەکا گەلەک جودا ھەبوو. ئەڤ باژارێ کو ئەز لێ کار دکم ژ سێ بەشێن وێ کوردی بوون، لێ نھا خەلکێ تکریت، حەویجە و بەغدایێ لێ نە. ئەز باوەر ناکم کو 20 کورد لێ مانە.”
ل پرانیا ناڤچەیێن کەرکووکێ ئالایێن ھەموو نەتەوەیان و ھەتا ئۆلان ژی ھاتنە بلندکرن، لێ تەنێ تشتێ کو قەدەغەیە ئالایێ کوردستانێیە.
پشتی 16 ئۆکتۆبەرا 2017، پرۆسەیا عەرەبکرنێ بەرفرەھ بوویە، روویێ ڤی باژاری ب ئاوایەکی ھاتیە گوھەرتن کو ئەگەر ئەڤ رەوشە بەردەوام بکە، دبە کو د چەند سالان دە چ سیمایەکێ کوردی لێ نەیێ دیتن.
ژ بەر خیانەتا 16 ئۆکتۆبەرا 2017، کەرکووک و بەشەکێ مەزن ژ ئاخا دەرڤەیی ئیدارەیا ھەرێما کوردستانێ ھات ژدەستدان و نھا داخواز تێ کرن کو ب ھەر ئاوایەکی بە گوھەرتنەک ل وی باژاری بێ کرن، ژ بەر کو ئەو رەوشا ھەیی، ژ ئالیێ وەلاتیێن کورد ڤە نایێ قەبوولکرن.
