د 17 جۆتمەھا سالا 2023 دە، رێڤەبەریا پەیەدێ ب رێژەیەکا مەزن نرخێ ھاتنووچوونێ زێدە کر، ئەڤ یەک بوو سەدەما نەرازیبوونەکا مەزن د ناڤ وەلاتیێن باژارێ کۆبانێ و گوندەوارێ وێ دە.
رێڤەبەریا گشتی یا ڤەگوھەستنێ یا سەر ب رێڤەبەریا پەیەدێ ڤە ل باژارێ کۆبانێ بریار دا کو نرخێ ھاتنووچوونێ ب رێژەیەکا مەزن زێدە بکە، نرخێ ھاتنووچوونێ ژ کۆبانی بەر ب دەریێ سینۆری یێ سێمالکا/فیشخابوورێ یا لگەل ھەرێما کوردستانێ ژ 65 ھەزار لیرەیێن سووریێ بۆ 90 ھەزار لیرەیان بلند کر.
نرخێ ھاتنووچوونێ ژ کۆبانی بۆ باژارێ قامشلۆ ژی بوو 52 ھەزار لیرەیێن سووری زێدە کر.
بریارا بلندکرنا نرخێ ھاتنووچوونێ پشتی مەھەکێ ژ بلندکرنا نرخێ سۆتەمەنیێ (مازۆت – بەنزین)یا کو ب رێژەیا 400% ھاتە بلندکرن، ل گۆری بریارا نوو، نرخێ لیترەک بەنزینێ کو ژ بۆ ئۆتۆمبێلێن گەشتیاری ھاتیە تەرخانکرن، ب رێژەیەک بەرچاڤ زێدە بوو و گھشتە 2100 لیرەیێن سووری. و بوھایێ وێ یێ بەرێ 525 لیرەیێن سووری بوو.
نرخێ لیترا بانزینێ ل بازارا رەش گھشتیە 4100 لیرەیان و بوھایێ وێ یێ بەرێ 1200 لیرە بوو.
ئەڤ بلندبوون بوو سەدەما نەرازیبوون و رەخنەیێن توند ژ ئالیێ وەلاتیان ڤە، ژ بەر کو ئەو د وێ باوەریێ دە نە کو بلندکرنا نرخێ سۆتەمەنیێ و چوون و ھاتنێ نە ل گۆری داھاتێ وانە و بارێ گران ل سەر چینا ھەژار زێدە دکە.
د ھەولەکێ دە ژ بۆ جیبجیکرنا پابەندبوونا ب بریارێ، رێڤەبەریا پەیەدێ ھشیاری دا کو ھەر کەسێ ڤان نرخێن دەست نیشان کری بنپێ بکە دێ ب کوژمێ 300 هەزار لیرەیان هێت سزاکرن و دێ 15 رۆژان ژ کارێ خوە ل سەر خەتێ هێت قەدەغەکرن.
