رێخستنا په‌كه‌كێ ئیرۆ راگهاند كو وان هێزێن خوه یێن چه‌كدار ژ كامپا مه‌خموورێ ڤه‌كشاندن و ئه‌ركا پاراستنا ئه‌وله‌هییا كامپا راده‌ستی جوانێن ل ور كرنه، مورات كارایلان ژی گۆت: «ئه‌م ب باوه‌رن كو گه‌لێ مه یێ ل ور دێ فكر و فه‌لسه‌فه‌یا ئاپۆ ب ره‌نگی هه‌ری باش ته‌مسیل بكه»!
په‌كه‌كێ ئیرۆ رۆژا پێنجشه‌می 19\10\2023ان داخۆیانی ده‌ربارێ كامپا مه‌خموورێ دا و گۆت كو ژ مه‌ها ئیلۆنێ ڤه وان هێزێن خوه یێن چه‌كدار ئانكو گێریلا ژ كامپێ ڤه‌كشاندنه و نها چ یێك ژ هێزێن وان ل كامێ تونه.
په‌كه‌كه ئیدیعا دكه كو وان هێز ژ بۆی پێشیگرتنا ل داعشێ شاندبوون كامپا مه‌خموورێ و ژ به‌ر كو وان میسیۆنا خوه ب داوی كر، ژ ور هاتن ڤه‌كشاندن.
د ڤێ ده‌ربارێ ده مورات كارایلان گۆت: «مه هێزێن خوه ژ كامپێ ڤه‌كشاندن و ئه‌ركا پاراستنا كامپێ راده‌ستی جوانێن ل ور كری یه، ئه‌م ب باوه‌رن كو گه‌لێ مه یێ ل كامپێ وێ فكر و فه‌لسه‌فه‌یا ئاپۆ ب ره‌نگی هه‌ری باش ته‌مسیل بكه».
كامپا مه‌خموورێ ته‌ڤی كو په‌نابه‌رێ تێ ده نه، لێ ئه‌ڤ چه‌ندین ساله په‌كه‌كێ وه‌كه باره‌گه‌هه‌كی خوه یێ له‌شكه‌ری لێ كریه، مه‌شق و كارێن په‌روه‌رده‌هیی تێ ده تێن ل دارخستن و پرانییا ئێریشێن كو ل سه‌ر به‌رژه‌وه‌ندیێن باشوورێ كوردستانێ تێن كرن ل ور تێن پلان كرن، ب ڤێ سه‌ده‌مێ ئه‌ڤ كامپ ده‌وام ژ هێلا ده‌وله‌تا ترك ڤه تێ بۆمبباران كرن.
