شەرێ پەکەکێ و ترکیێ ل سنۆرێ ئامێدیێ زراران دگەھینە مالێن وەلاتیان. وەلاتی دبێژن کو ئەو بەردەوام دەنگێ تۆپان و تەقەیا شەری دبھیزن و ئارامیا وان ھاتیە تێکدان.
ژ بەر شەرێ ناڤبەرا سوپایێ ترکیێ و چەکدارێن پەکەکیێ ل کۆمەلگەھا کانێ ل سنۆرێ قەزایا ئامێدیێ، زرار گەھشتنە وەلاتیێن وێ کۆمەلگەھێ و گولـلە ب ناڤ مالێن وان کەفتنە. وەلاتیەک ب ناڤێ بەشیر تایبەت ژ بۆ کوردستان 24 گۆت کو ژ بەر وی شەری ئارامیا وان تێک چوویە و بەردەوام د ترسێ دە نە.
ناڤبری گۆت ژی کو وان مێڤان ھەبوونە دەما ئەو شەر د ناڤبەرا سوپایێ ترکیێ و چەکدارێن پەکەکێ دە چێ بوو، گولـلەیەک ب پەنجەرا مالا وان کەفتیە لێ چ زرارێن جانی ژێ چێ نەبوونە.
وی وەلاتی تەکەز ل سەر وێ یەکێ کر کو ژ بەر وی شەرێ بەردەوام ل وێ دەڤەرێ د ناڤبەرا ترکیێ و پەکەکێ دە، ئەولەھی و ئارامیا وان تێک چوویە و سەر و مالێن وان بەردەوام د مەترسیێ دە نە. ھەروەسا داخوازا راوەستاندنا وی شەری کر ژ بۆ کو ئێدی رەوش و ژیانا وان ب وی رەنگی نەبە.
شەرێ پەکەکێ و ترکیەیێ ل دەڤەرێن سنۆری یێن ھەرێما کوردستانێ رۆژ ب رۆژ زێدەتر زرارێ دگەھینە وەلاتیێن ھەرێما کوردستانێ. ژ بەر وی شەری، نێزی 800 گوندان و ھەژمارەکا دەڤەرێن گەشتیاری ل سنۆرێ ھەرێما کوردستانێ ھاتنە وێرانکرن و بەردان. پرانیا وان گوندان دکەڤن سنۆرێ پارێزگەھا دھۆکێ. ڤێ یەکێ ژی زرارەکا زێدە گەھاندیە کەرتێن گەشتیاریێ و چاندنێ یێن ھەرێما کوردستانێ.
ل گۆر داوی ئاماژەیێن ناڤەراستا مەھا تەباخێ یا ئیسال، 274 گوند ل سنۆرێ پارێزگەھا دھۆکێ ژ بەر وی شەری ھاتنە بەردان کو 250 ژ وان دکەڤن سنۆرێ قەزایا ئامێدیێ و 24 ژی دکەڤن سنۆرێ قەزایا ئاکرێ. ھەروەسا 47 گوند ل سنۆرێ ئیدارەیا سەربخوەیا زاخۆیێ ژی ژ بەر وی شەری ھاتنە بەردان.
