پەکەکێ خالێن سەربازی یێن نێزیکی کامپا مەخموورێ و ل چیایێ قەرەچۆخێ ڤالا کرن و رادەستی ئارتێشا ئیراقێ کرن، ڤێ یەکێ ژی دەرفەت دایە ھێزێن ئیراقی کو ل ھەمبەر ھێزێن پێشمەرگە خالێن دن یێن لەشکەری ئاڤا بکن.
ل گۆر ئاگاهیان، چەکدارێن پەکەکێ چەند شکەفت ل چیایێن قەرەچۆخێ و 7 خالێن لەشکەری یێن دەردۆرا کامپا مەخموورێ رادەستی ھێزێن ئیراقی کرنە.
رادەستکرنا ڤان خالێن سەربازی ھیشت کو ھێزێن ئیراقی خالێن خوەیێن سەربازی ل سینۆرێ چیایێ قەرەچۆخێ ل ھەمبەر پێشمەرگە زێدە بکن.
ژێدەرەکی هایدار راگهاند، دڤیابوو ئەو خال ژ ئالیێ لیوایەکا ھەڤبەشا ئارتێشا ئیراقێ و ھێزێن پێشمەرگە ڤە ھاتبانا داگرتن، لێ نھا ب تەمامی کەتن دەستێ ھێزێن ئیراقی و دێ د پاشەرۆژێ دە ژی پرسگرێکان ژ بۆ ھێزێن پێشمەرگە دەرخن.
ھەروھا گۆت ژی، پەکەکە نە ئامادەیە ھەڤاھەنگیێ لگەل حکوومەتا ھەرێما کوردستانێ بکە و سیاسەتا کو دشۆپینە، خزمەتا دژبەرێن ھەرێما کوردستانێ دکە.
ل کامپا مەخموورێ دۆرا 12 ھەزار کەسان لێ دمینن و پرانیا وان ئالیگر و مالباتێن گەریلایێن پەکەکێ نە، پێشتر ژی گەلەک جاران ئەو کامپ ژ ئالیێ ترکیێ ھاتیە بۆمبەبارانکرن و زیانێن جانی و مادی د ئەنجامێ دە دەرکەتنە.
ڤالاکرنا بارەگەھێن پەکەکێ و رادەستکرنا وان بۆ ئارتێشا ئیراقێ پشتی وێ یەکێ تێ، نەتەوەیێن یەکگرتی ژ حکوومەتا ئیراقێ رە گۆتبوو، ژ بەر ھەبوونا چەکدارێن پەکەکێ ئەو ئالیکاریان ژ بۆ خەلکێ کامپا مەخموورێ ناشینن.
