ل گۆر زانیاران، ھێزەکا پێشمەرگەیان داخواز ژ سوپایێ ئیراقێ کریە، وان خالێن سەربازی یێن کو پەکەکێ بەردانە بدە دەستێ وان ژ بەر کو د سنۆرێ وان دە نە. سوپایێ ئیراقێ ئەو داخوازی رەد کریە و ژ بەر وێ سەدەمێ ژی شەر د ناڤبەرا وان دە چێ بوویە.
رۆژا یەکشەمێ، 22 جۆتمەھا 2023، ل چیایێ قەرەچووخ ل سنۆرێ مەخموورێ، ھێزەکا پێشمەرگەیان و سوپایێ ئیراقێ بەرھنگاری ھەڤ بوون. وان ب چەکێن سڤک و بیکەیسیان تەقە ل ھەڤ کریە و ھەژمارەکە کوشتی و برینداران ھەنە.
ل گۆر زانیاریان، وێ ھێزا پێشمەرگەیان کاریە یەک ژ وان خالێن سەربازی کۆنترۆل بکە. پشتی وێ یەکێ ژی، دانووستاندنان ل سەر رادەستکرنا دو خالێن دن د ناڤبەرا وان دە دەست پێ کریە.
پێشتر ژی چاڤکانیەکە ھایدار ل مەخموورێ راگەھاندبوو، پەکەکێ حەفت خالێن سەربازی و چەند شکەفت ل دەردۆرا مەخموورێ دانە دەستێ ھێزێن ئیراقێ.
وێ چاڤکانیێ ئاماژە دا وێ یەکێ ژی، رادەستکرنا وان خالێن سەربازی دەرفەت دایە ھێزێن ئیراقی کو خالێن خوەیێن سەربازی ل سنۆرێ چیایێ قەرەچووخ ل بەرنابەری پێشمەرگەیان زێدە بکن.
ب گۆتنا وێ چاڤکانیێ، ئەڤ یەک ژ نشکێ ڤە نەبوویە و چەند مەھەکان بەری نھا ئامادەکاری ژێ رە ھاتنە کرن و نھا ژی سوپایێ ئیراقێ دخوازە چەند جھێن دن ژی کۆنترۆل بکە.
ل سەر گرنگیا وان جھێن پەکەکێ دانە دەستێ سوپایێ ئیراقێ، وێ چاڤکانیێ گۆت، دڤێت ئەو دەڤەر ژ ئالیێ لیوایا ھەڤپارا سوپایێ ئیراقێ و ھێزێن پێشمەرگەیان ڤە بێ پرکرن، لێ نھا ب تەمامی د دەستێ ھێزێن ئیراقی دەیە و ئەڤ ژی دێ ل پاشەرۆژێ ئارێشەیان ژ بۆ پێشمەرگەیان چێ بکە.
ل دوو زانیارێن وێ چاڤکانیێ، پەکەکە ئامادە نینە ھەڤاھەنگیێ لگەل حکوومەتا ھەرێما کوردستانێ بکە و سیاسەتا وێ خزمەتا نەیارێن ھەرێما کوردستانێ دکە.
چەکدارێن پەکەکێ پشتی ئێریشا داعشێ بۆ سەر مەخموورێ ل سالا 2014، ب ھەڤاھەنگیا پێشمەرگەیان، ھاتبوون سنۆرێ مەخموورێ. پشتی روودانێن 16 جۆتمەھێ ژی، ب پشتەڤانیا ھێزەکا ئیراقی، ل چەند دەڤەرێن کوردستانی یێن دەرڤەیی ئیدارەیا ھەرێما کوردستانێ خالێن سەربازی و بنگەھێن چەکداری دانانە.
