داخویانیا سەرۆکاتیا ئەرکانان یا وەزارەتا پێشمەرگە دەربارێ بوویەرا ل مەخموورێ

وەزارەتا پێشمەرگە پابەندبوونا خوە ب کارکرنا ب حکوومەتا فەدەرال رە ژ بۆ چارەسەریەکە ریشەیی ژ کێشەیا رە مەخموورێ ره‌ دوبارە دکە.

سەرۆکاتیا ئەرکانان یا هێزێن پێشمەرگە د داخویانیەکێ دە راگهاند، «مخابن دوهی (22\10\2023) ل مەخموورێ بوویەرەکە نەباش روو دا و د ئەنجامێ دە ژ هەر دو ئالیان شەهید و بریندار چێبوون. ئەم ژ مالباتێن قوربانیان رە سەرساخیێ دخوازن و ژ برینداران رە ژی چاکبوونێ دخوازن».

د داخویانیێ دە هات گۆتن: «ئەم پابەندبوونا خوە ژ بۆ کارکرنا ب حکوومەتا فەدەرال رە ژ بۆ چارەسەریەکە ریشەیی و ماییندە دوبارە دکن کو دێ ئەولەهی و ئارامیێ ل سەرانسەرێ ئیراقێ پێک بینە».

گۆت ژی: «ئەم پشتگریا خوە ژ ناڤەرۆکا داخویانیا فەرماندارییا گشتی یا هێزێن چەکدار رە، ژ بۆ لێکۆلینەکە بلەز و شەفاف دەربارێ بوویەرێ رادگهینن، ژ بۆ دیارکرنا سەدەمان و دیتنا چارەسەریێن گونجاو ژ بۆ پێکانینا ئەولەهی و ئارامیێ ل هەرێمێ».

ژ ئالیەکی دن ڤە بەردەڤکێ فەرمانداریا گشتییێ هێزێن چەکدارێن ئیراقێ لیوا یەحیا رەسوول راگهاند: «سەرۆکوەزیر محەمەد شه‌یاع سوودانی ل سەر بوویەرا کو سێ کەسان جانێ خوە ژدەست دان و 7 کەس ژی بریندار بوون لێکۆلین دشۆپینە».

رەسوول گۆت، سوودانی فەرمان دایە کو کۆمیتەیەک بلند وەرە ئاڤاکرن ژ بۆ لێکۆلینکرنا ئەنجامێن بوویەرێ و دیارکرنا سەدەمێن دەرکەتنا ڤێ بوویەرێ.

ل گۆری داخویانیا بەردەڤکێ فەرمانداریا گشتی یا هێزێن چەکدار، سوودانی داخواز ژ هەموو هێزان کر خوە بگرن و تەکەز کر کو دڤێ هەموو فەرماندار و هێزێن د هەموو ئاستان دە هەست ب بەرپرسیاریێ بکن.

دوهی ئێڤارێ 22\10\2023ان، ژ بەر تێگهیشتنەکە شاش ل خالەکە کۆنترۆلێ یا لەشکەری، شەر و پەڤچوون د ناڤبەرا هێزێن پێشمەرگە و ئارتێشا ئیراقێ دە ل چیایێ قەرەچۆخێ روو دا، شەر و پەڤچوون چەند خولەکان بەردەوام کر، پشترە رەوش هات کۆنترۆلکرن.