“جوانێن شۆرەشگەر” ل قامشلۆ کەچەکە دن ژی رەڤاند

ل باژارێ قامشلۆ یێ رۆژئاڤایێ کوردستانێ کەچەکە دن یا 14 سالی ژ ئالیێ جوانێن شۆرەشگەر یێن سەر ب هەسەدێ ڤە ھاتە رەڤاندن.

مالباتا سالین محموود ئەیاد دبێژە، جوانێن شۆرەشگەر 17 رۆژ بەرێ کەچا وان یا یەکانە رەڤاندیە و وان ژ سازیێن رێڤەبەریا پەیەدێ خوەستیە کو کەچا وان ڤەگەرینن، لێ چ گوھدان ب وان نەھاتیە کرن.

چاڤکانیێن ئاگەھدار ژ قامشلۆ دیار کرن کو دایکا سالین ل ھەموو دەریێن سازیێن پارتیێ ل ھەرێمێ خستیە و وەکە ھەر جار بەرپرس و ھێزێن پارتیێ ھەبوونا وێ کەچێ رەد دکن دا کو داییک داخوازا ڤەگەراندنا یەکانە زارۆکا خوە نەکە.

ئەڤ دەمەکە رەڤاندنا زارۆکان و ب تایبەتییا کەچان ژ ئالیێ رێخستنێن سەر ب هەسەدێ ڤە ل رۆژئاڤایێ کوردستانێ زێدە بوویە، رۆژا 17 ڤێ مەھێ ژی یەپەژێ کەچێن ب ناڤێن میراڤ عەدنان خاشۆ یا 15 سالی و سێمێل زێدان ئیسماعیل یا 14 سالی رەڤاندبوون، تەڤی بانگێن ڤەگەراندنا وان ژ ئالیێ مالباتێن وان ڤە، ھین ژی ئەو ھەردو کەچ نەھاتنە ڤەگەراندن.

ل رۆژئاڤایێ کوردستانێ تەڤی کو پەیەدێ سۆز دایە نەتەوەیێن یەکبوویی و رێخستنێن ناڤدەولەتی کو زارۆکان چەکدار نەکە، لێ بەلێ باسکێن لەشکەری و جوانێن شۆرەشگەر یێن گرێدایی پەکەکێ، ھین ژی زارۆکێن تەمەن بچووک تەڤلی لەشکەرکرنا ب زۆر دکن و وان دبن کامپێن لەشکەرکرنێ یێن ل ھەرێمێن د بن کۆنترۆلا خوە دە.