دەولەمەندیێن باکورێ کوردستانێ ژ ئالیێ دەولەتا ترک ڤە بێ سینۆر تێن تالانکرن. ھەری داوی ژی دەر بارێ بەرهەمهینانا پەترۆلا گابارێ دە ژ ئالیێ وەزیرێ خەزینە و دارایی یێ ترکیەیێ محەمەد شیمشەک ڤە داخویانیەکا گرینگ ھات دایین. ل گۆری ڤێ داخویانییێ نھا ل گابارێ رۆژانە 25 ھەزار بەرمیلێن پەترۆلێ دهێن بەرھەمانین و ئەڤ یەک رۆژ ب رۆژیێ زێدە دبە.
ل گۆری داخویانیا وەزیر شیمشەک، “ب خێرا نەفتا گابارێ دێ کریزا ئابۆری کێم بت و یەدەکا نەفتێ ژی دێ زێدە ببە.” ھەتا سالا 2026 دێ بەرهەمانینا پەترۆلێ یا گشتی گهیتە ئاستەکێ کو ژ سەدی 18 پێویستیێن ترکییێ پێک بینە.” پشتی ڤێ داخویانییا وەزیر محەمەد شیمشەک چاڤێ ھەموو لایەنا ل پەکەکێ بوو کا دێ چ ھەلوەست وەرگریت.
پەکەکێ ھەیا نها دەھان جاران بۆرییێن نەفتا ھەرێما کوردستانێ تەقاندینە و ب ملیۆنان دۆلاران خسار گهاندیە ئابۆرییا ھەرێما کوردستانێ. لێ پەکەکێ دژی پەترۆلا گابارێ چ گاڤ نەئاڤێتیە ئەڤ ژی پر تشتەکی سەرنجراکێشە.
پەکەکە یا کو ب دەھان سالا چیایێ گابارێ د بن کۆنترۆلا وێ دە بوو، د ڤان سالێن داوی دە ل چیایێن باکورێ کوردستانێ ھەما ھەما بێ باندۆر بوویە. دەولەتا ترک؛ گەلەک جھێن پەکەکێ یێن سالێن 1990 دە دگۆت “ھەرێمێن رزگارکری” وەکە جوودی، گابار، بەستا، چارچەل، ماوا، ئاندۆک کرنە جھێن گەشتوگووزارێ. ئێدی شوونپێ گەریلایێن پەکەکێ ژی ل وان دەڤەران نەمایە.
