د ئەنجاما بۆمبەباران، پەڤچوون و ئێریشێن د ناڤبەرا چەکدارێن خوەجهی یێن سەر ب رێژیما سووریێ ڤە و هه‌سه‌دێ دە، 26 کەس ل گوندەوارێ دێرازۆرێ هاتن کوشتن.
ناڤەندا راگهاندنێ یا هه‌سه‌دێ بەلاڤ کر، هێزێن خوەجهی ب پشتەڤانیا هێزێن رێژیمێ، دوهی ب تۆپ و مووشەکان ئێریشی گوند و باژارۆکێن ئەبوو هەردووب، زیبان و ئەبوو هەمام کرن.
دیار کر ژی، هێزێن هه‌سه‌دێ هەولدانێن دەرباسبوونا وان چەکداران تێک برن و د ئەنجامێ دە، شەر و پەڤچوون د ناڤبەرا وان دە دەرکەتن.
هه‌سه‌دێ ئاشکەرە کر، د ئەنجاما وی شەری دە، 3 چەکدارێن هه‌سه‌دێ و 4 سڤیل هاتن کوشتن و 10 سڤیل بریندار بوون. هەروها 19 چەکدارێن سەر ب رێژیمێ ڤە ژی د وی شەری دە هاتن کوشتن و 20 چەکدار بریندار بوون.
ژ داویا تەباخا بۆری ڤە، ژ ئەنجاما گرتنا فەرماندارێ ئەنجوومەنا لەشکەری یا دێرازۆرێ ئەبوو خەولە ژ ئالیێ هه‌سه‌دێ ڤە، شەر و ئالۆزی د ناڤبەرا هه‌سه‌دێ و چەکدارێن خوەجهی دەردکەڤن.
وێ دەمێ شێخێ عەشیرا ئەل-عەقیدەت ل دێرازۆرێ ئیبراهم ئەل-حەفل ل دژی هێزێن هه‌سه‌دێ دەرکەت. هه‌سه‌دێ ژی ژ ئالیێ خوە ڤە گۆت، ئەل-حەفل سەرۆکێ فتنەیێ یە و ئێدی ژ ئالیێ هێزێن وان ڤە تێ خوەستن.
پشتی کو هه‌سه‌دێ رۆژا 6ێ ئیلۆنێ باژارۆکێ ئەل-زیبانێ، ناڤەندا ئەل-حەفل کۆنترۆل کر، شۆپا وی وندا بوو و بەری دەمەکێ دیسا دەرکەت و گەفا دەرخستنا هه‌سه‌دێ ژ هەرێمێن ل وان خوار.
