ھەڤدەمێ زێدەبوونا ئاستا ئارمانجکرنا بنگەھێن ھێزێن ئەمەریکی و ھەڤپەیمانیا ناڤدەولەتی ل سووریێ، کاروانەکێ لەشکەری یێ نوو یێ ھەڤپەیمانیێ دەرباسی گوندەوارێ حەسەکێ یێ رۆژئاڤایێ کوردستانێ بوو.
ل گۆری ژێدەرێن راگھاندنێ یێن سووری، ئیرۆ کاروانەکێ لەشکەرین یێ ھەڤپەیمانیا ناڤدەولەتی کو ژ 40 بارھەلگرێن بارکری ب ئالاڤێن لەشکەری و لۆجستیک پێک دھات، د رێیا دەرگەھێ ئەلوەلید یێ ھەڤسینۆرێ ھەرێما کوردستانێ دەرباسی رۆژئاڤایێ کوردستانێ بوو و ل بنگەھێ ھەڤپەیمانیێ ل گوندێ تل بێدەر ل گوندەوارێ حەسەکێ ب جھ بوو.
رۆژا پێنجشەمبێ ژی، کاروانەکێ لەشکەری یێ ھەڤپەیمانیا ناڤدەولەتی کو ژ 60 بارھەلگرێن بارکری ب ئالاڤێن لەشکەری و لۆجستیک پێک دھات دەرباسی رۆژئاڤایێ کوردستانێ بوو و ل بنگەھێ تل بێدەر ب جھ بوو.
سبەھا ئیرۆ میلیشیاتێن ب ناڤێ “ئەلموقاوەمە ئەل ئیسلامی ل ئیراقێ” د داخویانیەکێ دە راگھاند، کو بنگەھا ئەمەریکی یا لەشکەری ل شەدادیێ یا ل باشوورێ باژارێ حەسەکێ ب مووشەکان ئارمانج کریە.
شەڤا دوھ ژی میلیشیاتێن ناڤبووری، دەردۆرا بنگەھا خەراب ئەلجیر یا ئەمەریکی ل باژارۆکێ رمێلانێ ل رۆژئاڤایێ کوردستانێ ئارمانج کر.
“ئەلموقاوەما ئەلیسلامی ل ئیراقێ” د داخویانیەکێ دە راگھاند، کو دێ د ھەفتەیا بهێت دە دەست ب قۆناغەکا نوو بکە و بنگەھێن ئەمەریکی ب شێوەیەکی بەرفەرەھ ئارمانج بکە.
ژ 18 جۆتمەھا بووری ڤە، بنگەھێن ئەمەریکی ل سووریێ و ئیراقێ ژ ئالیێ میلیشیایێن ب ناڤێ “ئەلموقاوەما ئەلیسلامی ل ئیراقێ” تێن ئارمانکرن.
