بارەگەها رێخستنێ یا کەرکووک-گەرمیان یا پارتیا دەمۆکراتا کوردستانێ (پەدەکێ) ب مەراسیمەکێ پێشکێشی زانینگەھا کەرکووکێ ھات کرن. ئەندامەکی کۆمیتەیا ناڤەندی یا پەدەکێ ژی دبێژە: “ئەم دێ د چەند رۆژێن بێ دە بارەگەھەکە نوو ڤەکن.”
مەراسیم ب ئامادەبوونا ئالیکارێ سەرۆکێ پارلامەنتۆیا ئیراقێ و ئەندامێ کۆمیتەیا ناڤەندی یا پەدەکێ شاخەوان عەبدوللاھ؛ نوونەرێ زانینگەھا کەرکووکێ؛ جیگرێ پارێزگارێ کەرکووکێ؛ فەرماندارێ ئۆپەراسیۆنێن ھەڤبەشێن کەرکووکێ؛ سەرۆکێ لقێ سێیەمین یێ پەدەکێ و نوونەرێن ھەژمارەک پارتیێن سیاسی ھاتە کرن.
شاخەوان عەبدوللاھ د کۆنفەرانسەکە رۆژنامەڤانی دە راگھاند: “ئیرۆ مە ب فەرمی ئاڤاھیا بارەگەها رێخستنا کەرکووک-گەرمیان یا پەدەکێ ڤەگەراند و ب ل گۆری فەرمانا سەرۆک بارزانی، مە ئەڤ ئاڤاھی وەکە دیاری پێشکێشی زانینگەھا کەرکووکێ کر.”
شاخەوان عەبدوللاھ گۆت ژی: “ئەم سپاسیا سەرۆکوەزیرێ ئیراقێ محەمەد شیاع سوودانی دکن کو رێکەفتنا سیاسی یا د ناڤبەرا ھەولێر و بەغدایێ دە ژ بۆ ڤەکرنا ھەموو بارەگەھێن پەدەکێ ل کەرکووکێ، جیبجی کر.”
ھەروھا دا زانین ژی: “بارەگەھا لقا سێیەم یا پەدەکێ ل کەرکووکێ و ئاڤاھیا نوو یا بارەگەهێ رێخستنێ یا کەرکووک-گەرمیانێ ژی، دێ د چەند رۆژێن بێ دە ب فەرمی بێن ڤەکرن.”
ئەندامێ کۆمیتا ناڤەندی یا پەدەکێ تەکەز کر ژی: “پەدەکە دێ وەکە ھێزێن دن یێن سیاسی ل کەرکووکێ چالاکیێن خوەیێن سیاسی بەردەوام بکە.”
گۆت ژی: “ھەبوونا پەدەکێ ل کەرکووکێ دێ پێکڤەژیانا ئاشتیانەیا د ناڤبەرا پێکھاتە و نەتەوەیێن باژێر دە بھێزتر و کوورتر بکە و پێکھەتەیێن باژێر (کورد، عەرەب، ترکمەن، کرستیان و پێکھاتەیێن دن) بپارێزە.
ژ ئالیێ خوە ڤە، سەرۆکێ زانینگەھا کەرکووکێ در. عۆمران جەمال حەسەن راگھاند، “ئەم ژ دل سپاسیا سەرۆک بارزانی دکن ژ بۆ ڤێ دەستپێشخەریا جوان، زانستی و ئاکادەمیک. ئەڤ بارەگەھا کو ژ ئالیێ پەدەکێ ڤە پێشکێشی مە ھاتیە کرن، دێ ببە ئاڤاھیا کۆلیژا ئەندازیاریا پەترۆل و چاڤکانیێن سرووشتی.”
پشتی بوویەرێن 16 ئۆکتۆبەرێ، بارەگەها رێخستنێ یا کەرکووک-گەرمیان یا پەدەکێ ژ ئالیێ فەرماداریا ئۆپەراسیۆنێن ھەڤپارێن کەرکووکێ ڤە ھاتبوو داگیرکرن.
رۆژا 25 تەباخا 2023 سەرۆکوەزیرێ ئیراقێ محەمەد شیاع سوودانی فەرمان دابوو فەرمانداریا ئۆپەراسیۆنێن ھەڤبەش کو وێ بارەگەھێ ڤالا بکە و رادەستی پەدەکێ بکە، لێ ئەڤ بریارە نەھات جبجیکرن.
ل دژی وێ بریارێ ژی، ھەژمارەک ژ ئالیگرێن حەشدا شەعبی و ترکمەنێن کەرکووکێ، رۆژا 2/9/2023 ل دژی ڤەگەرا پەدەکێ بۆ کەرکووکێ، رێیا کەرکووک-ھەولێرێ گرتن.
وەلاتیێن کورد ژی ل دژی گرتنا رێ، دەست ب خوەپێشاندانەکا ئاشتیانە کرن، لێ ژ بەر دەستێوەردانا ھێزێن ئیراقی، 4 وەلاتیێن کورد ھاتن شەھیدکرن و ب دەھان خوەپێشاندەر ژی بریندار بوون.
پشترە کۆمیتەیا ناڤەندی یا پەدەکێ د جڤینا 26 جۆتمەھێ دە، ژ بۆ پاراستنا ئەولەھی و ئارامیا کەرکووکێ، بریار دا بەرەگەها رێخستنێ یا کەرکووک-گەرمیانێ، پێشکێشی زانینگەھا کەرکووکێ بکە.
پارتیا دەمۆکراتا کوردستانێ (پەدەکێ) ب ڤێ پێنگاڤا خوە تەکەز کر کو کەرکووک ھەر دلێ کوردستانێیە و پشتی 16 ئۆکتۆبەرێ ژی ھەر خەباتێ ژ بۆ چارەسەرکرنا برینا دلێ کەرکووکیان دکە.
