پارێزەر ئدریس عەلۆ چالاکڤانێ سیاسی و ئەندامێ ئەنجوومەنا ھەرێمی یا پارتیا دەمۆکراتا کوردستان-سووریێ، 10 سالن ژ ئالیێ پەیەدێ ڤە هاتیە رەڤاندن، ھەتا وەکە رۆژا ئیرۆ چ دانپێدان ژ پەیەدێ دەربارێ گرتنا وی دە دەرنەکەتینە.
ئدریس عەلۆ سالا 1968 ژ داییک بوویە ژ گوندێ دیکێ یێ ناڤچەیا راجۆیە، ل ناڤەندا باژارێ عەفرینێ ل تاخا ئەشرەفیێ دژیا و وەک پارێزەر کار دکر، ژ دەستپێکا کریزا سووریێ تەڤلی لڤ و تەڤگەرا دژی رێژیمێ بوو.
د 8 مژدارا 2013 گرووپەکێ چەکدار یێ سەر ب پەیەدێ ڤە ئێریش بر سەر مالا وی و ئدریس عەلۆ بن چاڤ کر، ژ بۆ جھەکی نەدیار بر و تا نھا نە دیارە د زیندانێن پەیەدێ دەیە، یان ژ بۆ رێژیمێ ھاتیە رادەستکرن.
گەلەک ھەول ژ ئالیێ مالباتا وی ڤە ھاتن دان دا کو چارەنڤیسا وی دیار بکن لێ ھەولێن وان بێ ئەنجام بوون، بەرپرسێن پەیەدێ کو ل عەفرینێ دەستھەلاتدار بوون دانپێدان ب وێ یەکێ نەکر و دگۆتن کو چ کەس ب ناڤێ ئدریس عەلۆ ل جەم وان تونەیە.
تەڤی بانگێن بەردەوام ژ ئەنجوومنا نشتیمانی یا کوردی، چالاکڤان و رێخستنان ڤە بۆ بداوی ئانینا ڤان کریار و بنپێکران، پەیەدە ل سەر پلانا خوە رژدە، و ھەر دەم و دەمەکێ ئەندام، و ئالیگرێن ئەنەکەسێ و پارتیێن د ناڤ دە دکە ئارمانج و بن چاڤ دکە، ئەنەکەسە ژی تەکەز دکە کو ئەڤ کریار بەرێ گەلێ کورد ددە کۆچبەریێ، ھەری داویێ جنێد سەید مەجید، ئەندامێ ئەنجوومەنا ھەرێمی یا پارتیا دەمۆکراتا کوردستان-سووریا ژ 15 تەباخێ ڤە ل گەل بەرزان حسێن رۆژنامەڤان د پارتیا دەمۆکراتا کوردستان–سووریا دە ھاتیە گرتن، د 30 ئیلوونێ دە بەرزان ھات بەردان لێ جنێد تا نھا گرتییە.
