بارەگەھا لەشکەری یا ھەڤپەیمانیا ناڤدەولەتی یا ل دژی داعشێ ل فرۆکەخانەیا حەریرێ یا ل پارێزگەھا ھەولێرێ شەڤا بۆری، 2 جاران راستی ئێریشان ھاتن.
دژەترۆرا ھەرێما کوردستانێ راگھاند، شەڤا بۆری دەمژمێر 23:30 و 00:40 ب ریا 2 درۆنێن بۆمبەبارکری ئێریش ل بارەگەھا لەشکەری یا ھەڤپەیمانیا ناڤدەولەتی یا ل دژی داعشێ ل فرۆکەخانەیا حەریرێ یا ل پارێزگەھا ھەولێرێ ھاتە کرن.
دژەترۆرا ھەرێما کوردستانێ د داخویانیا خوە دە ئاماژە ب وێ یەکێ کر، د ھەر دو ئێریشان دە، چ زیانێن جانی و مادی دەرنەکەتن.
ئەڤ یەک پشتی وێ تێ، رۆژا 7 مژدارێ ب 3 درۆنان ئێرش ل ھێزێن ھەڤپەیمانان ل فرۆکەخانەیا ناڤدەولەتی یا ھەولێرێ ھاتبوو کرن. دو درۆن ل ئاسمانی ھاتبوون تەقاندن ویا سێیەم ژی نەتەقیایی کەتبوو.
ژ نیڤا جۆتمەھا بۆری ڤە، رێخستنا “بەرخوەدانا ئیسلامی ل ئیراقێ” بەرپرسیاریا خوە ژ بەر زێدەتر ژ 25 ئێریشێن مووشەکی و درۆنان ل سەر ھێزێن ئامەریکی و ھەڤپەیمانان ل ئیراق و سووریەیێ راگھاندیە.
بەردەڤکێ پەنتاگۆنێ پات ریدەر رۆژا 6 مژدارێ ئەشکەرە کربوو، ژ 17 جۆتمەھا بۆری ڤە ھێزێن ئامەریکایێ ل سووریە و ئیراقێ، راستی 38 ئێرشان ھاتنە و 45 لەشکەر و کارمەند بریندار بوونە.
