پشتی دەرباسبوونا سالەکی ل سەر کوشتنا یەک ژ رێڤەبەرێن کۆمەلگەھا دەمۆکراتیک و ئازادا رۆژھلاتێ کوردستانێ (کۆدار)ێ ھندەک زانیاریێن نوو یێن د ڤێ دەربارێ دە ئاشکەرا دبن.
ل گۆر زانیاریێن بەردەست دەمەکی بەری کو ئەندامێ رێڤەبەریا کۆدارێ رێزان جاوید ل قامشلۆ د نیڤێ سالا 2022 دە بێ کوشتن، ئەو ل باژارێ سلێمانیێ بوویە و ژ ئالیێ پەکەکێ ڤە ھاتیە گرتن و پشترە ژی ئەو ژ بۆ قەندیلێ ھاتیە رەڤاندن. پشترە گڤاش لێ ھاتیە کرن کو ڤیدەۆیەکی تۆمار بکە و ئەندامتیا خوە و گرێدانا خوە یا ژ بۆ پەکەکێ دوبارە راگەھینە و پشترە ژی ئەو شاندنە رۆژئاڤایێ کوردستانێ و ل وێ دەرێ ھاتە کوشتن.
د ڤێ دەربارێ دە مالپەرا ئاڤا تۆدەی کو ژ ئالیێ چەند رۆژنامەڤانەکێن ئازادێن رۆژھلاتێ کوردستانێ ڤە تێ برێڤە برن و بەشەک ژ وان نشتەجیھێن ئامەریکایێ نە، د سالا 2018 دە ئاشکەرا کرن کو رێزان جاوید ژ بۆ خوە رزگارکرنا ژ دەست پەکەکێ بەرێ خوە دایە سلێمانیێ و خوەستیە ئێدی د خەباتێن چەکداری دە نەمینە، لێ ل سلێمانیێ ب ئاوایەکی گرتی ئەو برنە بۆ قەندیلێ.
ھەمان مالپەرێ ھەر وێ دەمێ ژی ھشیاری دا پەکەکێ کو ژ ژیان و سەلامەتیا رێزان جاوید بەرپرسە، لێ ل ھەمبەر وێ پەکەکێ ت بەرسڤەک نەدا، ھەتا مەھا تەباخا سالا 2022 ئانگۆ پشتی چار سالان نووچەیا ئاڤا تۆدەیێ کوشتنا رێزان جاوید ژ ئالیێ پەکەکێ ڤە ب ئاوایەکی گومانی ھاتە راگەھاندن، کو گومان ھەیە بەری وێ ژی ھاتبە کوشتن و گومان ھەیە ب دەستێ چەکدارێن پەکەکێ ل رۆژئاڤایێ کوردستانێ ھاتبە گولەباران کرن و ژ مالباتا وی رە ھاتە راگەھاندن کو د ئێریشەکە بالەفرێن ترکیێ دە شەھید بوویە.
ڤێ دەربارێ دە نڤیسکار و رەخنەگرێ سیاسەتا پەکەکێ حەمید گەوھەری ئەشکەرە کر: “رێزان جاوید ل گەل مالباتا سیامەند موعینی یێ ھەڤسەرۆکێ پژاکێ پێوەندیێن وی ھەبوونە و دەمەکە درێژ ژێ دوور کەت و دەست ژ پەکەکێ بەردا. پشترە ب ئاوایەکی گومانی ل سووریێ ھات کوشتن. نھا مژارا کوشتنا وی نە زەلالە و گەلەک گومان ل سەر ھەنە.”
دەما کو پەکەکێ کوشتنا رێزان جاوید راگەھاند، یەک ژ فەرماندارێن بەرێ یێن پەکەکێ و نھا دەست ژ پەکەکێ بەردایی مەحموودێ رەش ژی راگەھاند: “پژاک پارچەیەکە ژ پەکەکێ و پەکەکە بکارتینە، پەکەکێ بخوە پژاک ئاڤا کریە، ژ بەر وی یەکێ ژی ژ بۆی پەکەکێ گرنگ نینە ھەڤسەرۆکێ وێ پارتیێ ببە سووریێ و ل وێ دەرێ بێ کوشتن. ل کوردستانا سووریێ ژی وسا دکە، ل وێ دەرێ خەلکێ دگرە و دبە بۆ شنگال و سلێمانیێ. ئەڤ تایبەتمەندیا پەکەکێ یە. مژارا رێزان جاوید ژی وسایە، ژ رۆژھلاتێ کوردستانێ ئانیە دبە بۆ رۆژئاڤایێ کوردستانێ، باشە ما ئەو کەسە چاوا دزانە ئەردنیگاریا وێ دەرێ چاوایە و خوازایا وێ چاوایە. رۆژئاڤایێ کوردستانێ ژ بۆ وی جیھەکە بیانییە، نەزانیە چ بکە. پشترە ژی ل سەر بوویەرێ پرۆپاگاندایێ دکن و دبێژن رێزان ھاتیە کوشتن، باشە چاوا و ل کودەرێ و ژ بۆ چ ھاتیە کوشتن؟ ئەڤ ھەموو پرسن. پەکەکە ئالیەکی دبێژە بۆ سەردان چوویە رۆژئاڤایێ کوردستانێ، ژ ئالیێ دن ڤە ژی دبێژە ل وێ دەرێ بەرپرس بوویە. ژ بەر وێ ژی باوەریا خەلکێ ب وان گۆتنێن پەکەکێ نایێ.”
ھەروھا گۆت: “پەکەکێ گومان ژ رێزان جاوید ھەبوو، ب تایبەت پشتی رەخنەیێن ل پەکەکێ کرین و نەدزانی ب چ رێیەکی ڤە وی ژ ھۆلێ راکە، ژ بەر رێزان دگۆت پژاک سیاسەتا پەکەکێ یە، لێ نابە ئازادیا بریارێ ژ وان بێ ستاندن. ژ بەر وێ ژی پژاک و پەیەدە و ھەدەپە نھا نیگەرانن ژ پەکەکێ و دبێژن مە ئازاد بکن کو ئەم بکارن سیاسەتێ بکن و ئەڤ دەنگە ھەر دچە زێدە دبە. گەلەک گومان ھەنە کو رێزان جاوید شاندن رۆژئاڤایێ کوردستانێ. ژ بەر رێزان ژی ب دەنگەک بلند ڤە دگۆت مە ئازاد بەردن ئەم سیاسەتێ بکن.”
