نه‌ینه‌وا.. حه‌شدا شه‌عبی كارتێن ده‌نگدانێ ب دارێ زۆرێ ژ وه‌لاتییان دستینه‌

ملیشیایێن شیعه‌ یێن حه‌شدا شه‌عبی، ژ بۆی هلبژارتنێن پارێزگه‌هان ل پارێزگه‌ها نه‌ینه‌وایێ، ده‌ست ئاڤێتییه‌ كۆمكرنا كارتێن بایۆمه‌تری یێن ده‌نگدانێ و ب دارێ زۆرێ ژ ئه‌ندامێن خوه‌ و شێنییان دستینه‌.

چاڤكانیێن پێگه‌ها داركامازی ئاشكه‌ره‌ كرن، هه‌موه‌ختا دەستپێكرنا پرۆباگاندایا هەلبژارتنێن ئه‌نجومه‌نێن پارێزگەهان، ل پارێزگه‌ها نه‌ینه‌وایێ حەشدا شەعبی ژ بۆی خاپاندنا گه‌ل و ب ده‌ستخستنا كارتێن وان یێن بایۆمه‌تری كه‌تییه‌ ناڤا هه‌ولێن مه‌زن ده‌ و ل سەر هەرچەكدارەكی خوه‌ فەرز كریە 10 كارتان ژ كەس و كارێن خو وەربگره‌، ئەگەر نا وێ ژ ره‌فێن حه‌شدێ وه‌ره‌ ئاڤێتن.

ل گۆری ئاگاهیێن ده‌ستێ مه‌، فه‌رماندارێتیا حه‌شدا شه‌عبی ژ شێنیێن نه‌ینه‌وایێ و ناڤچه‌یێن وێ گۆتیه‌ كو هەر كەسی 100 كارتێن ده‌نگدانێ ژ وان ره‌ دابین بكه‌، وێ وه‌كه‌ چه‌كدار ب فه‌رمی د ره‌فێن حه‌شدێ ده‌ وه‌ره‌ وه‌زیفه‌دار كرن.

چاڤكانیێن داركا مازی گرێدای مژارێ ئاگاهی ژ هنه‌ك شێنیێن نه‌ینه‌وایێ گرتن و ل گۆری وان حه‌شدا شه‌عبی ده‌ست ئاڤێتییه‌ كڕینا كارتێن ده‌نگدانێ ژ وه‌لاتییان  و ب قاسی 50 هه‌زار دیناران ژ بۆی هه‌ر كارته‌كه‌ ده‌نگدانێ.

ئه‌ڤ هه‌ولێن حه‌شدا شه‌عبی یێن ترساندن و زێده‌كرنا زه‌ختا ل سه‌ر شێنیێن نه‌ینه‌وایێ، به‌شه‌كی پیلانا داگیركرنا ئیراده‌ و ده‌نگێ هه‌مولاتیێن ده‌شتا نه‌ینه‌وایێ و ده‌نگێن شێنیێن شه‌نگال و زومارێ یه‌، ژ بۆ كو ئه‌ڤ هه‌رێمێن كوردستانی ب ته‌مامه‌تی بكه‌ڤن ژێر هه‌ژموونا حه‌شدا شیعی و ئیرانێ و ره‌وشا سه‌ربازییا یا كو ب دارێ زوورێ پشتی بوویه‌رێن 16 جۆتمه‌ها 2017ان هاتیه‌ فه‌رز كرن، وه‌ره‌ دۆماندن.

ل شه‌نگال و زمارێ حه‌شدا شه‌عبی ئالیكاریێن حكومه‌تا فه‌ده‌رال ب ناڤێ نامزه‌دێن خوه‌ پارڤه‌دكه‌

ژ ده‌ما رزگاركرنا شه‌نگالێ ژ ته‌رۆرا داعشێ ژ هێلا پێشمه‌رگه‌هێن كوردستانێ ڤه‌ و هه‌یا رۆژا مه‌ یا ئیرۆ، رێخستنا په‌كه‌كێ كو نها بوویه‌ به‌شه‌كی حه‌شدا شه‌عبی و میحوه‌رێ مقاوه‌مێ یێ ئیرانێ ل شه‌نگالێ، خوه‌ ل شه‌نگالێ ئاسێ كریه‌ و بوویه‌ سه‌ده‌م كو به‌شا هه‌ری زێده‌ یا خه‌لكێ شه‌نگالێ د كامپێن پارێزگه‌ها دهۆكێ ده‌ وه‌كه‌ ئاواره‌ بمینن.

حكوومه‌تا هه‌رێما كوردستانێ، ژ بۆی خزمه‌تا ئاواره‌یێن شه‌نگالێ ده‌وام د ناڤا هه‌ولان ده‌ یه‌، ده‌وام بانگا حكوومه‌تا فه‌ده‌رال دكه‌ كو ئالیكارییان ژ ئاواره‌یێن شه‌نگالێ ره‌ بشینه‌، لێبه‌لێ حكوومه‌تا فه‌ده‌رال ل په‌ی ڤێ بانگا حكوومه‌تا هه‌رێما كوردستانێ نه‌هات. ئیرۆ ژی ب ده‌ستپێبوونا پرۆباگاندایا هلبژارتنێ، حكوومه‌تا فه‌ده‌رال ئالیكاریێن ئاواره‌یان خستنه‌ ژێر د خزمه‌تا حه‌شدا شه‌عبی ده‌ و نها حه‌شدا شه‌عبی ب ناڤێ نازمزه‌تێن خوه‌ وان ئالیكارییان ل سه‌ر ئاواره‌یێن ڤه‌گه‌رییایی پارڤه‌دكه‌.

چاڤكانیێن داركا مازی ئاشكه‌ره‌ كرن كو ل رۆژا 2\11\2023ان لیوایا 74ان یا حه‌شدا شه‌عبی ژ بۆ پرۆباگاندایا نامزه‌تێ خوه‌ یێ كۆتا ئێزدییان 14 كامیۆن ژ ئالیكاریێن حكومه‌تا فه‌ده‌رال شاندنه‌ شه‌نگالێ، ئامر لیوایێ 74ان مراد شێخ كالو ڤان ئالیكارییان ب ناڤێ نامزه‌تێ حه‌شدێ عیدان شڤان شێخ كالو ل سه‌ر ئاواره‌ و شێنیێن شه‌نگال و زومارێ پارڤه‌دكه‌.