کەسووکارێن زارۆکێن رەڤاندی ژ ئالیێ ھێزێن سووریا دەمۆکراتیک، هەسەدێ ڤە، داخوازا ڤەگەراندنا وان دکن، نوورەدین خاشۆ کو یەک ژ کەسووکارێن زارۆکانە، ژ پەیەدێ و هەسەدێ رە گۆت: رێزێ ل یاسایێن خوە بگرن و زارۆکێن مە ڤەگەرینن.
ژ 17ێ مەھا جۆتمەھێ ڤە ل باژارێ قامشلۆ یێ رۆژئاڤایێ کوردستانێ چەکدارێن یەکینەیێن پاراستنا ژنێ یەپەژێ کو بەشەکە ژ ھێزێن سووریا دەمۆکراتیک هەسەدێ، 2 زارۆک ب ھەڤ رە، میراڤ عەدنان خاشۆ 15 سالی و سیمێل زێدان ئیسماعیل 14 سالی، رەڤاندنە و تەڤلی لەشکەریا نەچار کرینە، تەڤی ھەولێن مالبات و کەسووکارێن وان، بۆ ڤەگەراندنێ، تا نھا نە ئالیەکێ گوھدان دایە، نە ژی کارەک بۆ ڤەگەراندنا وان کرنە.
نوورەدین خاشۆ کو مامێ میراڤێ یە د ھەمان دەمێ دە خالێ سیمێلێ یە، ل سەر رووپەلا خوە یا تۆرێن جڤاکی بەلاڤ کریە کو، ژ دەما برازی و خوارزیا وی ھاتنە رەڤاندن تا نھا، هیچ ئالی و کەسەکی نە پەیەدێ و نە ژی هەسەدێ بەرسڤا وان نەدایە.
خاشۆ دا زانین کو رەڤاندنا زارۆکان بەردەوام دکە، و داخواز ژ ئالیێ پەیوەندیدار کر کو رێزێ ل یاسایێن خوە بگرن و زارۆکان ڤەگەرینن.
ل گۆری ئامارێن ل بەر دەست، د مەھا جۆتمەھێ دە 5 زارۆکێن ژێر 18 سالیێ ژ ئالیێ ھێزێن سووریا دەمۆکراتیک هەسەدێ ڤە ل رۆژئاڤایێ کوردستانێ و حەلەبێ ھاتنە رەڤاندن، بچووکترین زارۆک 12 سالی یە، د ڤێ مەھێ دە یەک ھاتیە رەڤاندن. ژ کۆما وان ب تەنێ یەک ھاتیە ڤەگەراندن.
سالین ئەیاد مەحموود، 14 سالی ل باژارێ قامشلۆ نێزیک یاریگەھێ د 7ێ مەھێ دە ژ ئالیێ جوانێن شۆرەشگەر ڤە ھاتیە رەڤاندن کو کەچا تەکانە یا مالباتا خوە یە.
سۆلین ئیبراھیم 15 سالی، 14 مەھێ، ل باژارێ قامشلۆ ژ ئالیێ جوانێن شۆرەشگەر ڤە ھاتیە رەڤاندن.
د 20ی مەھێ دە عەزەدین بەکری نەسان کو ب خوە عەرەبە، ب تەنێ 12 سالی یە ل تاخ شێخ مەقسوودا حەلەبێ ژ ئالیێ جوانێن شۆرەشگەر ڤە ھاتیە رەڤاندن.
د 8ێ مژدارا 2023 سەبریە شیار مستۆ، 13 سالی، ژ شێنیێن گوندێ عومەر سمۆ ل ناڤچەیا شەرا یا سەر ب باژارێ عەفرینێ ڤە یە ژ تاخا شێخ مەقسوودا حەلەبێ ب مەبەستا لەشکەریا نەچار ھاتبوو رەڤاندن، پشتی چەند رۆژان ھات ڤەگەراندن.
فەرماندارێ ھێزێن سووریا دەمۆقراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچار دکن.
