ھەڤدەمێ دەرباسبوونا وەرزێ زڤستانێ، ئازارا وەلاتیان ل باژار و باژارۆکێن رۆژئاڤایێ کوردستانێ ژ بەردەوامیا کریزا سۆتەمەنیا ئۆتۆمبیلان و گەرمکرنێ بەردەوامە.
کریزا سۆتەمەنیێ ل رۆژئاڤا کوردستانێ بەردەوامە، ئیرۆ ژی ل پێش وێستگەھێن سۆتەمەنیێ ل باژارێ قامشلۆ، ب سەدان ئۆتۆمبیلان د نۆرەیێن وەگرتنا سۆتەمەنیێ دە راوەستیابوون.
د دیمەنێن کو چالاکڤانیێن ژ رۆژئاڤا کوردستانێ د سۆسیال مەدیایێ دە پارڤە کرنە دیار دبە، قەرەبالغەکە زێدە ل پێش وێستگەھان ھەیە و وەلاتی ژ بەردەوامیا کریزێ کو باندۆر ل ھەمی جۆمگێن ژیانێ یێن سەرەکی کریە، نە رازی نە.
ل گۆر زانیاریان، رێڤەبەریا پەیەدێ سۆتەمەنیێ ل سەر گەلەک وێستگەھان دابەش ناکە و پشکا تایبەت ب ھەر وێستگەھەکێ کێم کریە، تەڤلی ڤێ یەکێ ژی کوالیتیا گازوایلێ خرابە.
ھەڤدەمێ کریزا سۆتەمەنیێ ل ناڤچەیێن رۆژئاڤایێ کوردستانێ، ب سەدان تانکەرێن بارکری ب پەترۆل و گازوایل و بەنزینێ، ل دەرگەھێ باشوورێ قامشلۆ، ل بەندێ نە کو بەرەڤ ناڤچەیێن گرووپێن چەکدار و رێژیما سووری بچن.
