چاپەمەنیا پەکەکێ ل شوونا کو مژاران وەکە هەیی پارڤە بکە، ل دژی دەولەتێن داگیرکەرێن کوردستانێ “ترکیێ، ئیراقێ، ئیران و سووریێ” رایا گشتی یا کورد هان بدە، رادبە و پڕ ب ئاوایەکی بێ ئەخلاقانە هەر رۆژ ئێریشی پەدەکێ، بارزانیان و حکوومەتا هەرێما کوردستانێ دکە، پەکەکە ب قاسی کو د چاپەمەنیا خوە دە ئێریشی سەر بارزانیان و پێشمەرگەیێن باشوورێ کوردستانێ دکە، ئەو قاس ئێریشی دەولەتێن داگیرکەر و لەشکرێن وان ناکە.
ت رۆژ نینە کو چاپەمەنیا پەکەکێ د بن هن سەرناڤێن جودا و دوور ژ چاندا کوردی و وەلاتپارێزیێ ئێریشی سەر بارزانیان و باشوورێ کوردستانێ نەکە، ژ بۆ ڤێ یەکێ ژی هن جاران خوە ژ بیر دکن کا بانگەشەیا چ دکن و سەرۆکێ وان یێ کو خوە تەسلیمی دەولەتا ترکیێ کری چ ژ وان رە گۆتیە و چ ژ وان دخوازە، ژ بەر کو دەما باس ل دژاتیکرنا پەدەکێ و بارزانیان تێ کرن، ئێدی هەر تشت دسەکنە، ت پیڤەرێن ئەخلاقی، چاندی، مللی و ولاتپارێزی نامینن، ئێدی پەکەکەیی وەکە گۆرێن هار ئێریش دکن و ت یاسا و ت ئەخلاقەکی ل بەر چاڤ ناگرن.
د دەمەکی دە کە پەکەکێ و رێبەرێ وان یێ خوە تەسلیمی ترکیێ کری ب شەڤ و رۆژ باس ل براتیا گەلان دکن، باس ل دیمۆکراتیککرنا ترکیێ و تەڤ جیهانێ دکن، هاتنە ب ئاوایەکی پڕ بێ ئەخلاقانە د چاپەمەنیا خوە دە ئێریشی سەرۆکێ هەرێما کوردستانێ نێچیرڤان بارزانی و سەرۆکێ حکوومەتا هەرێما کوردستانێ مەسروور بارزانی دکن، چما؟ ژ بەر کو سەرۆکێ هەرێمێ و سەرۆکێ حکوومەتێ ب داخویانیەکێ رۆژا زمان و چاندێیا ترکمەنێن ل هەرێما کوردستانێ پیرۆز کرنە!
گەلۆ گەر ئەڤ کارێ پەکەکێ نە دوو رووتی و بێ ئەخلاقیەکە ئەشکەرە بە چییە؟ ما نە هەر پەکەکە و رێبەرێ وێ یێ زندانکرینە باس ل براتیا گەلان دکن؟ ما پیرۆزباهیا رۆژا زمان و چاندێیا ترکمەنێن کوردستانێ ت زرار ددە کوردان؟ چما دەما رێڤەبرێن هەدەپێ “شاخا باکور یا پەکەکێ” پیرۆزباهیا سەدسالیا دامەزراندنا ترکیێ کرن ئەڤ نە خیانەت بوو بەلکو براتیا گەلان و سیاسەت و دەمۆکراتیکرنا ترکیێ بوو؟! چما هەر تشت ژ پەکەکێ و پارتیێن سەر ب وێ ڤە رە حەلالە، لێ ژ خەلکێ رە حەرامە؟
هەر کەس دزانە پەکەکە ل همبەر تەڤ داگیرکەرێن کوردستانێ و ب تایبەتی ل همبەر سووریە و ئیران و ئیراقێ بێ دەنگە و وان رەخنە ناکە، ئێریشی دەولەتا ترکیێ ژی ناکە و ب تەنێ هن رەخنەیێن بچووک ل رایەدار و پارتیێن ترکیێ دگرە و هەول ددە د بن ناڤێ “براتیا گەلان” دە کوردان مەحکوومی دەولەتێن داگیرکەر بکە و د ناڤا وان دە ئاسیمیلە بکە.
ل جەم پەکەکێ پیرۆزکرنا رۆژا چاند و زمانیا ترکمەنان ژ ئالیێ نێچیرڤان بارزانی و مەسروور بارزانی ڤە تشتەک نەئاساییە، لێ تشتا ل جەم وان ئاسایی ب کوشتن دانا جوانێن کورد، ئاسمیلەکرنا جڤاکا کورد د ناڤا جڤاکا ترکیێ دە، پیرۆزکرنا رۆژا دامەزراندنا دەولەتا ترکیێ، و تەسلیمکرنا زێدەتر ئا خاکا پیرۆزا کوردستانێ یە.
پەکەکە نە براتیا گەلان بەلکو خاپاندنا کوردان دخوازە، پەکەکە د بن ناڤێ براتیا گەلان دە دخوازە کوردان ب گەلەمپەری و یێن باکور ب تایبەتی مەحکوومی بن دەستیێ بکە، گەر ولو نەبە ما پیرۆزکرنا رۆژا چاند و زمانیا ترکمەنێن کو ل هەرێما کوردستانێ دژین ژ ئالیێ نێچیرڤان بارزانی و مەسروور بارزانی ڤە چ زرارێ ددە کوردان؟ ما ئەڤ نە بەشەکە ژ براتیا گەلان و دەمۆکراتیکبوونا باشوورێ کوردستانێ کو تەڤ وەلاتیان ب ئۆل، نەتەوە و چاندێن جودا د ناڤا خوە دە دپارێزە؟ ئەم پر باش دزانن کو دەرا پەکەکێ و رێبەرێ وێ دئێشە لێ بلا وە بە.
