دیسا ب درۆنان ئێرشی بالافرگەها حه‌ریرێ یا ل هەولێرێ هات کرن.
چاڤکانیەکە پلەبلند یا ئەولەهیێ یێ هەرێما کوردستانێ راگهاند کو دانێ سبەهێ دیسا ب درۆنان ئێرشی بالافرگەها حه‌ریرێ هاتیە کرن.
چاڤکانیا پلەبلند دیار کر کو ئێرش ساعەت 01:10ێ سبەهێ پێک هاتیە.
گرووپا ب ناڤێ “بەرخوەدانا ئیسلامی” یا د بن سیوانا گرووپێن ملیسێن شیعە یێن ئالیگرێن ئیرانێ دە، بەرپرسیاریا ئێرشێ گرت سەر خوە.
د داخویانیا کو ژ ئالیێ گرووپێ ڤە هات دایین دە هات راگهاندن کو ئێرش ب درۆنێ هاتیە کرن و درۆن ل هەدەفا خوە کەتیە.
گرووپێ هەروها دا زانین کو ئەو ئێرش وەکی بەرسڤەکە ئێرشێن ل غەزەیێ هاتیە کرن.
وەزارەتا پاراستنێ یا ئامەریکایێ (پەنتاگۆن) دەربارێ ئێرشان دە داخویانیەک بەلاڤ کر.
ل گۆری داخویانیا داوی، ل ئیراق و سووریێ ل دژی هێزێن ئامەریکایێ و هێزێن هەڤپەیمانیا ناڤدەولەتی 61 ئێرش هاتنە کرن و 58 لەشکەر ژی بریندار بوونە.
پەنتاگۆنێ دا زانین کو 33 ژ وان ئێرشان ل سووریێ و 28 ژی ل ئیراقێ هاتنە کرن.
هەروها ئامەریکا ژ بەر ڤان ئێرشان گرووپێن نێزکی ئیرانێ تۆهمەتبار دکە.
ل گۆری داخویانیێن پەنتاگۆنێ، ئارتێشا ئامەریکایێ 3 جاران بارەگەهێن گرووپێن چەکدارێن ل سووریێ کرنە ئارمانج.
