بەردەڤکێ پلاتفۆرما زمانێ کوردی شەرەفخان جزیری بانگ ل پارلامەنتەرێن کورد کر کو “ل پارلەمەنتۆیێ ب کوردی باخڤن”.
بەردەڤکێ پلاتفۆرما زمانێ کوردی شەرەفخان جزیری، کو ژ بۆ زمانێ کوردی ببە زمانێ فەرمی و پەروەردەھیێ دخەبتە، داخوازا ئاڤاکرنا سازیا زمانێ کوردی یا کو ناڤەندا وێ ل ئامەدێ بە کر. جزیری ب ھنجەتا کو کاندیدێن شارەداریان دڤێت کوردی بزانن، بانگ ل پارلامەنتەرێن کورد کر کو “ل مەجلیسێ ب کوردی باخڤن”.
بەردەڤکێ پلاتفۆرما زمانێ کوردی شەرەفخان جزیری دیار کر کو 100 سالن ل سەر زمان و ناسنامەیا کوردی پێڤاژۆیا ئاسیمیلاسیۆنێ بەردەوامە.
جزیری گۆت کو “دەولەت گەلەک جاران نزانە ژ کوردان چ دخوازە” و وەها دەوام کر: “گۆتن ئەم دێ کوردان تونە بکن. ل سەر پرۆژەیان خەبتین. گەلەک تشت کرن، ژ زەواجا کورد و ترکان بگرن ھەتا قەدەغەکرنا کوردی ل دبستانان، ھەتا د وارێ پەروەردەھیێ دە کورد ل پەی خوە ھشتن. ژ بۆ ل کوردستانێ زانینگەھ نەیێن ڤەکرن، 100 سالن دەولەت دخوازە کوردان تونە بکە، لێ ئەم دبینن، کورد 100 سالن ل بەر خوە ددن و ئاسیمیلە نەبوونە، زمان، ناسنامە و دیرۆکا خوە پاراستیە. لێ ژ نھا و پێ ڤە نابە کو ئەم تەنێ ب ڤێ میراتەیا سەدسالێ رازی ببن، دڤێت ئەم ڤێ یەکێ پێش بخن، ژ نھا و پێ دە کوردی بکن پیڤانەک سیاسی، د راستیێ دە دڤێت ئەم د لێکۆلینێن سیاسی دە بکن پیڤانا ھەری گرینگ”.
“دڤێت کاندیدێن سەرۆککۆماریێ کوردی بزانن”
جزیری دەستنیشان کر کو ئەو دێ ل تاخ و کۆلانان ژ بۆ بەلاڤکرنا زمانێ کوردی بخەبتن و دەستنیشان کر کو دڤێت سیاسەت ژی ب بەرپرسیاری رابە و بال کشاند سەر گرینگیا رێڤەبەریێن ھەرێمی. جزیری ب بیر خست و داخواز کر کو زمانێ کوردی ببە زمانێ فەرمی و پەروەردەھیێ، داخوازا ئاڤاکرنا سازیا زمانێ کوردی ل ئامەدێ نوو کر.
جزیری سەبارەت ھلبژارتنێن ھەرێمی یێن پێشەرۆژێ ئەڤ پێشنیارە ژ بۆ پارتیێن سیاسی یێن باژارێن کوردان کر:
-دڤێت د رێڤەبەریێن ھەرێمی دە بکارئانینا کوردی ئەساس بێ گرتن.
-دڤێت زانینا کوردی ببە پیڤانەک ھەڤپار ژ بۆ ھەموو کاندیدێن کو دێ بەشداری ھلبژارتنێن ھەرێمی یێن ھەرێما مە ببن. ئەم داخواز دکن کو ھەموو نامزەدێن کورد ب کوردی باخڤن، گۆتووبێژان بکن، بەشداری جڤین، کۆنفەرانس و پانەلان ببن.
-کەسێن کو ژ بۆ شارەداریان تێن وەزیفەدارکرن دڤێت دو زمانان، کوردی و ترکی بزانن و د وارێ خوە دە پسپۆر بن. ئەم پێشنیار دکن کو د ڤی واری دە ئامادەکاری بێن کرن. ب ڤێ یەکێ زمانێ کوردی قیمەتێ دستینە و دھێلە کو کارمەند د دەما خزمەتا گەل دە ب رەحەتی دانووستاندنێ بکن. ب ڤی ئاوایی کارێ گەلێ ھەرێمێ ھێسانتر دبە و د سازیێن فەرمی دە شانازیا ئاخافتنا ب کوردی تێ دیتن.
