99 رۆژن جنێد سەید مەجید ئەندامێ ئەنجوومەنا ھەرێمی یا پارتیا دەمۆکراتا کوردستان-سووریا ب فەرمانا پەکەکێ ژ ئالیێ چەکدارێن پەیەدێ ڤە ل گرکێ لەگێ هاتیە رەباندن، تا نھا چ ئاگاھی ل سەر چارەنڤیسا وی تونە نە.
مەجید ژ 15 تەباخێ ڤە ل گەل بەرزان حسێن رۆژنامەڤان د پارتیا دەمۆکراتا کوردستان – سووریا دە ھاتیە گرتن، د 30 ئیلوونێ دە بەرزان ھات بەردان لێ جنێد تا نھا گرتییە.
ئەڤ نە جارا یەکێ یە جنێد سەید مەجید تێ گرتن، بەری نھا دو جارێن دن ژی ھاتیە گرتن و راستی ئەشکەنجەیێ ھاتیە:
د 12 تەباخا 2017، ھات گرتن و د 12 سباتا ھەمان سالێ ھات بەردان.
د 5 ئادارا 2019 دە ھات گرتن و تێ دە راستی ئەشکەنجەیا توند و ھۆڤانە ھات.
ژ ئالیێ خوە ڤە محەمەد ئیسماعیل سەکرەتەرێ پارتیا دەمۆکراتا کوردستان – سووریا دا زانین: دۆسەیا جنێد گھاندنە ئالیێ ئەمەریکی، فرانسی و ناڤدەولەتی، دا کو کار و فشارێ ل پەیەدێ بکن.
سەکرەتێرێ پارتیێ بانگا سەربەستبەردانێ کر و ئانی زمان: ھەڤدەمێ چالاکڤان و رۆژنامەڤان تێنە گرتن کەسێن سەرخوەش و بازرگانێن مادەیێن ھشبر ل کۆلانان دە ب رەحەتی و ئازادی کاروبارێن خوە دکن، و ئاستەنگیان ژ خەلکێ رە دروست دکن.
د ڤێ دەربارێ دە رێخستنا دەنگێ گرتیان، ل سەر رووپەلا خوە ل سەر تۆرێن جڤاکی دویەمین جارە، داخویانیا تایبەت ب ناڤبووری بەلاڤ دکە، تێ دە ژ پەیەدێ خوەست کو د زووترین دەم دە چارەنڤیسا وی دیار بکە و سەربەست بەردە.
