د چەند رۆژێن بۆری دە ل رۆژھلاتێ کوردستانێ 2 کۆلبەر ژ بەر سەرمایێ رەق بوونە و کۆلبەرەکی دن ژی ژ بەر گولـلە رەشاندنا ھێزێن ئەولەھیا ئیرانێ ژیانا خوە ژ دەست دا.
ل رۆژھلاتێ کوردستانێ 2 کۆلبەرێن کورد یێن ب ناڤێن رەحمان مەعرووفی یێ خەلکێ پیرانشارێ و قەسیم کەریمی یێ خەلکێ سۆما و برادۆستێ ل زۆزانێن رۆژھلاتێ کوردستانێ یێن ل سەر سینۆر ژ بەر سەرمایێ رەقبوون و مرین پشتی چەند رۆژان تەرمێن وان ژ ئالیێ خەلکێ ڤە ھاتن دیتن.
رەحمان مەعرووفی کۆلبەرەکی خەلکێ باژارێ پیرانشارە و د دەما کۆلبەریێ دە ل بلنداهییێن چیایێن پیرانشار ژ بەر سەرمایێ رەق دبە و دمرە. ئەڤ دویەم کۆلبەرە کو د ڤێ ھەفتیێ دە ژ بەر سەرمایێ ژیانا خوە ژ دەست ددە.
رێخستنا مافێ مرۆڤ یا ھەنگاو دوھ 22/11/2023 راگەھاند، تەرمێ رەحمان مەعرووفی یێ کۆلبەر و خەلکێ گوندێ گەزگەسکا سەر ب باژارێ پیرانشارێ، ل سینۆرێ گانپە یا وی باژاری ژ ئالیێ خەلکێ ڤە ھاتیە دیتن.
رەحمان مەعرووفی 23 سالیە و بابێ دو زارۆکانە. د دەما کۆلبەریێ دە ل زۆزانان وندا دبە و ژ بەر سەرمایێ رەق دبە و ژیانا خوە ژ دەست ددە.
قەسیم کەریمی ژی کۆلبەرەکی دنێ کوردێ تەمەن 23 سالیە و خەلکێ گوندێ فیروزیان یا نێزیکی ناڤچەیا سۆما و برادۆستا باژارێ ئورمیێ یە. ئەو ژی د دەما کۆلبەریێ دە ل بلنداهییێن چیایێن سینۆرێ باکورێ کوردستانێ ژ سەرما رەق دبە و ژیانا خوە ژ دەست ددە.
ژ ئالیێ دن ڤە ل سینۆرێ بانە کۆلبەرەکی تەمەن 25 سالی یێ ب ناڤێ ئەسعەد ھەسەنپوور ژ بەر گولـلە لێ ھاتن رەشاندن ل سەر سینۆر ھات بریندار کرن و پشتی یەک رۆژ مایینا ل نەخواشخانەیا باژارێ بانە، ژیانا خوە ژ دەست دا.
