بوھابوونا نرخێ زەیتێ، کو ھەر تەنەکەیەکا 16 لیتری، گھشتیە زێدەتری 90 دۆلارێن ئەمەریکی، ھێڤیەک ل با جۆتکارێن کورد ل عەفرینا رۆژئاڤایێ کوردستانێ، چێکر، کو بکاربن زیانا کو راستی ھاتنە قەرەبۆ بکن، لێ بەلێ کۆمێن چەکدار ژی رێژەیا باجێن خوە بلندتر کرن.
ل دەڤەرێن د بن دەستێ ئەل ئەمشات دە ل ناڤچەیا شیێ و مابەتا و ھندەک گوندێن ب سەر ڤە، 20 دۆلارێن ئەمەریکی ل سەر ھەر دارەکا خوەدی بەرهەم، ھاتیە سەپاندن، هەر وەها دارێن کەسێن کۆچبەرکری ل کامپێن شەھبایێ ب تەمامی ھاتنە دەستەسەرکرن، ئەو ژی ب تۆمەتا کو ئالیگرێن پەیەدێ نە، ھەژمارا وان دارێن دەستەسەرکری 275 ھەزار دارن، و ھەر یەک ل گوندێ خوە مایە، دۆلارەک ل سەر ھەر دارەکی وی ھاتیە سەپاندن و رێژەیا 5 ل سەدی ژێ بەرھەمێ زەیتێ ل گوڤاژگەھان ھاتیە سەپاندن.
ب وێ یەکێ ئیسال تەنێ چەکدارێن سولتان سلێمان شاھ کو ب ئەمشات ناڤدارە، زێدەتری 4 ملیۆن دۆلارێن ئەمەریکی ل سەر دو ناڤچەیان سەپاندنە.
ناڤەندا ناڤچەیا شیێ ملیۆنەک و 100 ھەزار دۆلارێن ئەمەریکی کۆما باجان و بوھایێ رێژەیا زەیتێ ژ گوڤاشگەھان ھاتیە سەپاندن و ستاندن.
700 ھەزار دۆلارێن ئەمەریکی ل سەر گوندێ سەنارێ
700 ھەزار دۆلارێن ئەمەریکی ل سەر گوندێن چەقەلا کو 3 گوندن، ژێرین، ژۆرین و ئۆرتێ
600 ھەزار ل سەر گوندێ ئانقەلێ
500 ھەزار ل سەر ناڤەندا ناڤچەیا مابەتا
300 ھەزار ل سەر گوندێ ھسێ
300 ھەزار ل سەر گوندێ ھێکێچێ
200 ھەزار ل سەر گوندێ ئاشکا رۆژھلات
20 ھەزار دۆلار ل سەر گوندێ خەلیل
16 ھەزار دۆلار ل سەر گوندێ ئالکانا
ئەڤ ئامارە ژ بلی ھەژمارەک گوندێن دن یێن کو د بن دەستێ ئەمشات دە نە، کو ژ بلی وان دەڤەران ل گوند و ناڤچەیێن دن یێن د بن دەستێ ھەزات، شەرقیێ، قەیلەق ئەلشام، و ب دەھان گرۆپێن دن ھەمان باج ل سەر کوردان تێنە سەپاندن.
د 23 مژدارێ دە ھەڤپەیمانیا نشتیمانییا ھێزێن شۆرەش و ئۆپۆسزیۆنا سووریێ جڤینەک ل دار خست تێ دە بریار دا کو ل دەڤەرێن د بن دەستێ وێ دە کو عەفرین و گوندەوارێ وێ ژی د ناڤ دە نە، دادپەروەری بهێت بجیکرن، و ئەنجامدەر و پێکینەرێن تاوان و بنپێکرنان، بهێن سزادان و دادگەھکرن، ھەر وەھا داوی ل سەپاندنا باجان بهێت ب تەنێ د رێیا وەزارەتا دارایی یا ب سەر حکوومەتا دەمکی دە بە، تا نھا چاڤێن شێنیێن کورد ل بجیکرنا ڤان بریارانن.
