ئۆفیسا دەزگەها خێرخوازیا بارزانی یا کەرکووکێ پرۆژەیا «دەستێ هەڤکاریێ» ل کەرکووکێ راگهاند و پەرە، سەلکێن خوارنێ و پێدڤیێن خوەندنێ ل سەر 30 مالباتێن هەژار یێن کەرکووکێ بەلاڤ کرن.
بەرپرسێ ئۆفیسا دەزگەها خێرخوازیا بارزانی یا ل کەرکووکێ رێبوار محیەدین راگهاند، مە ئیرۆ 28ێ مژدارێ پرۆژەیا «دەستێ هەڤکاریێ» ل کەرکووکێ راگهاند و ب هەڤاهەنگیا ل گەل رێخستنا (ئەغصان ئەل-کەرم) و سەلاحەددین سەرداری، مە پەرە، سەلکێن خوارنێ و پێدڤیێن خوەندنێ ل سەر 30 مالباتێن کێمدەرامەت بەلاڤ کرن.
دا زانین ژی، مالباتێن کو ئیرۆ ئالیکاری ل سەر وان هاتنە بەلاڤکرن، بەرێ سەردانا ئۆفیسا دەزگەها خێرخوازیا بارزانی یا کەرکووکێ کربوون و پشتی لێکۆلینا کۆمیتەیا مە، ئەم گهیشتن وێ ئەنجامێ کو رەوشا ڤان مالباتان نەباشە و ژ بەر ڤێ یەکێ مە ئامادەکاریا بەلاڤکرنا ئالیکاریێ ل وان کر.
گۆت ژی: وەکە هەموو رێخستنێن دن، ئەم هەر سال هەژمارەک پرۆژەیان پلان دکن و وان پێشنیاری سەرۆکێ دەزگەها خێرخوازیا بارزانی دکن.
هەروها گۆت: سەرۆکێ بۆردا دەزگەها خێرخوازیا بارزانی مەسروور بارزانی و سەرۆکێ دەزگەها خێرخوازی مووسا ئەحمەد گرنگیەکە تایبەت ددن خەلکێ کەرکووکێ.
دەستنیشان کر: سالا بۆری ب زێدەتر ژ دو ملیار دینار، ئالیکاریێن وەک سەلکێن خوارنێ، پێدڤیێن خوەندنێ، ئاڤا پاقژ و گەلەک تشتێن دن ل سەر وەلاتیێن کەرکووکێ هاتن دابەشکرن.
بەرپرسێ ئۆفیسا دەزگەها خێرخوازیا بارزانی یا ل کەرکووکێ دیار کر، ژ نها ڤە پلانان داتینن، ژ بۆ بکارن د 2024ان ده ب ئاوایەکی باشتر خزمەتا وەلاتیێن کەرکووکێ بکن.
چاڤكانی: كوردستان 24
