ئیرانێ 6 گرتیێن کوردێن کو د دۆزێن جودا دە جەزا ل وان هاتبوو برین، دارڤە کرن،هەروها 2 کەسێن دن یێن کو یەک ژ وان زارۆکە ژی هاتن دارڤەکرن.
ژ وان کەسان 4 ژ ئیلامێ و 2 ژ وان ژی ژ باژارێ کۆهدەشت و مەهابادێ نە.
ل گۆری رێخستنێن مافێن مرۆڤان یێن رۆژهلاتێ کوردستانێ، ئیرۆ گرتیێ کوردێ ب ناڤێ ئەیووب کەریمی یێ خەلکێ مەهابادێ کو ئەڤ 14 سالن د گرتیگەهێ دە بوو، ل گرتیگەها قزل هسارێ یا کەرەجێ دارڤەکرن.
ل گۆری زانیاریان ئەیووب کەریمی و 6 کەسێن دن سالا 2009ان ل مەهابادێ ب تۆهمەتا کوشتنا مەلایێ ب ناڤێ عەبدولرەحمان تینا هاتبوون گرتن و ئادارا 2016ان دادگەهێ بریارا دارڤەکرنێ ل وان بریبوو.
دوهـ ژی گرتیێن ب ناڤێ ئیقبال فەتحولاهی یێ ئیلامی و موحسین ئەمیرای یێ ژ کۆهدەشتا پارێزگەها لۆرستانێ ل گرتیگەها قزل هسارێ یا کەرەجێ هاتن دارڤەکرن.
هەر دو کەس ژی بەری 5 سالان ب تۆمەتا بازرگانیا مادەیێن هشبەر جەزایێ دارڤەکرنێ ل وان هاتبوو برین.
ل گۆری ئاگاهیێن رێخستنێن مافێن مرۆڤان، دوهـ 3 گرتیێن دن یێن کوردێن ب ناڤێ شەهرام محەمەدبەگی (38)، عەلی ئاغامحەمەدی (47) و ناسی مەقسوودی کو ل گرتیگەهەکە باژارێ ئیلامێ هاتبوون گرتن، هاتن دارڤەکرن.
هات راگهاندن کو هەر 3 گرتیێن کورد ژ پارێزگەها ئیلامێ یا رۆژهلاتێ کوردستانێ نە و ب تۆهمەتا «کوشتنا ب قەست» جەزایێ دارڤەکرنێ ل وان هاتبوو برین.
ئیرانێ هەروها 24ێ چریا پاشینێ حامدرەزا ئازەئیێ 17 سالی و میلاد زۆهرەڤەندێ 22 سالی ژی دارڤە کرن.
ئۆفیسا مافێ مرۆڤان یا نەتەوەیێن یەکبوویی دارڤەکرنا هەر دو جوانان شەرمەزار کر و بانگا بداویئانینا جەزایێن دارڤەکرنێ کر.
ل گۆری ئامارێن رێخستنا مافێ مرۆڤانا ئیرانێ (ئهر) و پلاتفۆرما بهەڤرە ل هەمبەری جەزایێ دارڤەکرنێ یا ل ناڤەندا پاریسێ، پار ل ئیرانێ هەری کێم 582 کەس هاتنە دارڤەکرن و ژ سالا 2015ان ڤە هەژمارا هەری زێدەیە. سالا 2021ان ژی 333 کەس هاتنە دارڤەکرن.
